പഴയങ്ങാടി: എരിപുരത്തെ പഴയങ്ങാടി താലൂക്ക് ആശുപത്രിയോട് ചേർന്ന സ്ഥലത്ത് നിന്ന് കൊവിഡ് കാലത്ത് പാറപൊട്ടിച്ച് മണ്ണു നീക്കം ചെയ്യുന്നത് ആശുപത്രിയിൽ എത്തുന്നവർക്ക് ഭീഷണിയാകുന്നു. ആശുപത്രിയിൽ പുതുതായി ആരംഭിച്ച കൊവിഡ് ട്രയാജ് സെന്ററിന് സമീപത്താണ് മെഷീൻ ഉപയോഗിച്ച് പാറ പൊട്ടിക്കുന്നത്. ഇതിന്റെ കാതടിപ്പിക്കുന്ന ശബ്ദം ആശുപത്രിയിലെ രോഗികൾക്കും ഡോക്ടർമാർക്കും ഉൾപ്പടെ തലവേദനയായി.

ഇവിടെ നിന്ന് പൊടിപടലം ആശുപത്രിയിലേക്ക് പടരുന്നതായും പരാതി ഉണ്ട്. താലൂക്ക് ആശുപത്രിയിൽ ദിവസേന 100 കണക്കിന് രോഗികൾ ചികിത്സ തേടി എത്തുന്നുണ്ട്. വാക്സിനേഷനും കൊവിഡ് പരിശോധനയ്ക്കുമായി ആളുകളെത്തുന്നുണ്ട്. ഇതിനുസമീപത്തായുള്ള ഐ.സി.ഡി.എസ് ഓഫീസ് ജീവനക്കാർക്ക് ശബ്ദം കാരണം ഓഫീസിൽ ജോലി ചെയ്യാൻ പറ്റാത്ത അവസ്ഥയാണ്. പാറ പൊട്ടിക്കൽ നിർത്തിവയ്ക്കാൻ ആവശ്യമായ നടപടി ഉണ്ടാകണമെന്നാണ് ആവശ്യം ഉയരുന്നത്.