ചെറുവത്തൂർ: കൊവിഡ് വ്യാപനം തുടരുന്ന പശ്ചാത്തലത്തിൽ ജനങ്ങളുടെ സൗകര്യാർത്ഥം ചെറുവത്തൂർ സാമൂഹികാരോഗ്യ കേന്ദ്രത്തിൽ കൊവിഡ് രോഗവുമായി ബന്ധപ്പെട്ട ഒ.പി.വിഭാഗം പ്രവർത്തനക്ഷമമാക്കുന്നു. കൊവിഡ് -19 രോഗികൾ,രോഗ ലക്ഷങ്ങളുള്ളവർ ,സമ്പർക്കപട്ടികയിലുള്ളവർ, എന്നിവർക്കായുള്ള പ്രത്യേക ഒ.പിയാണ് ആരംഭിക്കുന്നത്. ഒ.പിയിൽ എത്തിച്ചേരുന്ന രോഗ ലക്ഷണങ്ങളുളളവർ, പ്രാഥമിക സമ്പർക്കപട്ടികയിലുള്ളവർ, വീട്ടിൽ ചികിത്സയിൽ കഴിയുന്ന കൊവിഡ് രോഗികൾ എന്നിവരെ പ്രത്യേകം സജ്ജമാക്കിയ ഒ.പി.യിൽ ഡോക്ടർ പരിശോധിക്കുകയും ആന്റിജൻ ടെസ്റ്റിന് വിധേയമാക്കുകയും ചെയ്യും.

24 മണിക്കൂറും ചികിത്സ ലഭിക്കുന്ന സംവിധാനമാണ് ഒരുക്കുന്നത്. പരിശോധനയിൽ പുതുതായി കൊവിഡ് -19 സ്ഥിരീകരിച്ച രോഗലക്ഷണങ്ങൾ ഇല്ലാത്തവരെ കൃത്യമായ മാർഗ നിർദേശങ്ങൾ നൽകി വീട്ടിലോ ഡൊമിസിലറി കെയർ സെന്ററിലേക്കോ അയക്കും. രോഗലക്ഷണങ്ങൾ ഉള്ളവരെ സ്ഥാപനത്തിൽ നിരീക്ഷണത്തിൽ വെക്കാനുമുള്ള സൗകര്യങ്ങളൊരുക്കിയിട്ടുണ്ട്. ഇതിനായി ഓക്സിജൻ സൗകര്യത്തോടു കൂടി 6 ബെഡുകൾ സജ്ജീകരിച്ചിട്ടുണ്ട്. ചെറുവത്തൂർ ബ്ലോക്ക്‌ പരിധിയിലെ രോഗികളെ ചികിത്സാ കേന്ദ്രങ്ങളിലേക്ക് മാറ്റുന്നതിനായി ആംബുലൻസ് സൗകര്യവും ഒരുക്കിയിട്ടുണ്ട് .ബ്ലോക്ക് പഞ്ചായത്ത് പ്രസിഡന്റ് മാധവൻ മണിയറ, ജില്ലാ ഡെപ്യൂട്ടി ഡി.എം.ഒ .ഡോ.എ.വി. രാംദാസ് ,മെഡിക്കൽ ഓഫീസർ ഡോ. ഡി.ജി. രമേഷ്, ജില്ലാ കൊവിഡ് സെൽ നോഡൽ ഓഫീസർ ഡോ. പ്രസാദ് തോമസ് എന്നിവർ ആവശ്യമായ മുന്നൊരുക്ക പ്രവർത്തനങ്ങൾക്ക് നേതൃത്വം നൽകി. കൊവിഡ് വാക്സിനേഷൻ കേന്ദ്രം ചെറുവത്തൂർ കൊവ്വൽ എ.യു.പി. സ്കൂളിലേക്ക് മാറ്റും.