കാഞ്ഞങ്ങാട്: കൊവിഡ് മാനദണ്ഡം ലംഘിച്ച സ്വകാര്യ ലാബിനു നഗരസഭ അര ലക്ഷം പിഴയിട്ടു. പുതിയ കോട്ടയിൽ പ്രവർത്തിക്കുന്ന കെ.ഡി.സി ലാബിനെതിരെയാണ് നഗരസഭ നടപടി സ്വീകരിച്ചത്. ലാബിനെതിരെ നിരന്തരം പരാതി ലഭിച്ചതിനാൽ നഗരസഭ ആരോഗ്യ വിഭാഗം നടത്തിയ പരിശോധനയിൽ കൊവിഡ് രോഗനിർണ്ണയ സമയത്ത് ഉപയോഗിക്കുന്ന സുരക്ഷാ ഉപകരണങ്ങളും വസ്തുക്കളും അശാസ്ത്രീയമായി കൈകാര്യം ചെയ്യുന്നത് ശ്രദ്ധയിൽപ്പെട്ടതിനാലാണ് നടപടി സ്വീകരിച്ചത്.

ജനവാസ കേന്ദ്രത്തിന് സമീപത്തായി സ്ഥിതി ചെയ്യുന്ന മെഡിക്കൽ ലാബ് പ്രവർത്തന രീതിയെപറ്റി നിരവധി പരാതികളാണ് നാട്ടുകാർ നഗരസഭയുടെ ശ്രദ്ധയിൽ കൊണ്ടുവന്നത്. തുടർന്നാണ് ആരോഗ്യ വിഭാഗം പരിശോധന നടത്തിയത്. നിയമലംഘനം നടത്തിയ ലാബിന് പിഴ ചുമത്തുകയായിരുന്നു.