കാഞ്ഞങ്ങാട്: പുതിയകോട്ട മാന്തോപ്പ് മൈതാനി മുൻവശത്തുള്ള ബസ് കാത്തിരിപ്പ് കേന്ദ്രം ഇനി ഓർമ്മയിൽ മാത്രം. കാഞ്ഞങ്ങാട് ടൗൺ സ്ക്വയർ നിർമ്മിക്കുന്നതിന്റെ ഭാഗമായാണ് കെട്ടിടം പൊളിച്ചു നീക്കിയത്. ഏകദേശം 40 വർഷത്തിന് മുകളിൽ പഴക്കമുണ്ട് മാന്തോപ്പ് മൈതാനിയിലെ ബസ് സ്റ്റോപ്പിന്.

1984 ൽ പഞ്ചായത്തായിരിക്കെയാണ് ബസ് സ്റ്റോപ്പ് നിർമ്മിച്ചത്. ബസ് കാത്തിരിപ്പ് കേന്ദ്രത്തോടൊപ്പം തന്നെ ഒരു അനാദികച്ചവടവും ഇവിടെ നടന്നിരുന്നു. വിവിധ സർക്കാർ ഓഫീസുകളിലേക്ക് ഉള്ള ഫോറങ്ങൾ പൂരിപ്പിക്കുന്നവരൊക്കെ ഇവിടെയായിരുന്നു ഇരുന്നിരുന്നത്.

കഴിഞ്ഞ നഗരസഭ ഭരണസമിതി ഇത് പൊളിച്ചു നീക്കുന്നതിന് മുന്നിട്ടിറങ്ങിയിരുന്നു. വിവിധ നിയമതടസ്സങ്ങൾ വന്നതിനാൽ പൊളിച്ചു നീക്കാൻ സാധിച്ചിരുന്നില്ല. ഈ ഭരണസമിതിയുടെ തുടക്കത്തിൽ തന്നെ ഇത് പൊളിച്ചുനീക്കുകയായിരുന്നു.