കണ്ണൂർ: കൊവിഡ് വ്യാപന പശ്ചാത്തലത്തിൽ ജില്ലയിലെ കിടപ്പ് രോഗികൾക്കായി ജില്ലാ പഞ്ചായത്ത് ഏർപ്പെടുത്തിയ രണ്ട് മൊബൈൽ വാക്‌സിനേഷൻ യൂണിറ്റുകളുടെ ഫ്‌ളാഗ് ഓഫ് വാക്‌സിൻ ചലഞ്ചിലൂടെ ശ്രദ്ധേയനായ ചാലോടൻ ജനാർദ്ദനൻ നിർവ്വഹിച്ചു. ജില്ലാ പഞ്ചായത്ത് പ്രസിഡന്റ് പി.പി ദിവ്യ അദ്ധ്യക്ഷത വഹിച്ചു.
മൊബൈൽ വാക്‌സിനേഷനായി രണ്ട് ട്രാവലറുകളും ഡ്രൈവർമാരെയും ഇന്ധനവുമാണ് ജില്ലാ പഞ്ചായത്ത് നല്‍കുന്നത്. ആവശ്യമായ ഡോക്ടർമാർ, നഴ്‌സുമാർ, മറ്റാരോഗ്യ പ്രവർത്തകർ എന്നിവരെ ദേശീയ ആരോഗ്യ ദൗത്യം വഴിയാണ് നിയോഗിക്കുക. ആദ്യഘട്ടത്തിൽ ട്രൈബൽ മേഖലയിലും വൃദ്ധസദനങ്ങളിലുമാണ് മൊബൈൽ വാക്‌സിനേഷൻ യൂണിറ്റിന്റെ സേവനം ഉറപ്പാക്കുക.
വൈസ് പ്രസിഡന്റ് അഡ്വ. ബിനോയ് കുര്യൻ, സ്ഥിരം സമിതി അദ്ധ്യക്ഷന്മാരായ വി.കെ സുരേഷ് ബാബു, അഡ്വ.കെ.കെ രത്‌നകുമാരി, അഡ്വ. ടി. സരള, യു.പി ശോഭ, ജില്ലാ പഞ്ചായത്ത് അംഗങ്ങളായ സി.പി ഷിജു, എൻ.വി ശ്രീജിനി, എൻ.പി ശ്രീധരൻ, ജില്ലാ പഞ്ചായത്ത് സെക്രട്ടറി വി. ചന്ദ്രൻ, ഡി.എം.ഒ ഡോ. കെ. നാരായണ നായ്ക്, ഡി.പി.എം ഡോ. പി.കെ അനിൽകുമാർ, ഡോ. സന്തോഷ് എന്നിവർ പങ്കെടുത്തു.