അപ്പപ്പാറ: കാടിന് നടുവിൽ പ്രകൃതിയോട് ചേർന്ന് ഒരു വീടും അതി​ൽ കഴി​യുന്ന കുറച്ച് മനുഷ്യരും. തിരുനെല്ലിക്കാട്ടിനുള്ളിലാണ് ഈ വീട്. കുനിക്കോട് ഗോപാലൻ ചെട്ടിയുടെ വൈക്കോൽ മേഞ്ഞ, ചാണകം മെഴുകിയ വീട്. പുറംലോകത്ത് കാണുന്ന കോൺക്രീറ്റ് കൊട്ടാരങ്ങളൊന്നും ഈ പച്ചമനുഷ്യരെ പ്രലോഭിപ്പിക്കുന്നി​ല്ല.

കുമ്പളയിൽ നിന്ന് നൂറ്റാണ്ടുകൾക്ക് മുൻപ് വയനാട്ടിലേയ്ക്ക് കുടിയേറിയ ഇവരുടെ കുടുംബം ആറ് പതിറ്റാണ്ട് മുൻപ് നിർമ്മിച്ച വീട് ഇന്നും തലയുയർത്തി നിൽക്കുന്നു. ഗോപാലൻ ചെട്ടിയുടെ അച്ഛൻ തിമ്മപ്പൻ ചെട്ടിയാണ് 1962 ൽ ഈ വീട് പണിതത്. അന്ന് വയനാടൻ കാടുകളിൽ സമൃദ്ധമായിരുന്ന മുളകളാണ് ഇന്നും വീടിന്റെ മേൽക്കൂരയിലുള്ളത്.

കാടും കിളികളും മയിലും മലയണ്ണാനുമൊക്കെ ചേർന്ന് ഇവി​ടെ മധുരമായ പശ്ചാത്തല സംഗീതമൊരുക്കുന്നു. ദാഹമാറ്റാൻ കാട്ടുചോലയുണ്ട്‌. തൊഴുത്തിൽ നിറയെ പശുക്കൾ. തൊടിയിൽ ചിക്കി ചികഞ്ഞ് നടക്കുന്ന നാടൻ കോഴികൾ.

ഗോപാലൻ ചെട്ടിയുടെ മകൻ ബാബു നല്ലൊരു ജൈവകർഷകനാണ്. ആവശ്യത്തി​നുള്ള നെല്ലും പച്ചക്കറികളുമെല്ലാം സ്വയം കൃഷി ചെയ്തുണ്ടാക്കുന്നു. ഭക്ഷണം പാചകം ചെയ്യുന്നത് പഴയ രീതിയിലുള്ള വി​റകടുപ്പിലാണ്. ഗ്യാസ് സ്റ്റൗവില്ല, ഫ്രി​ഡ്ജില്ല ... ആധുനികമായ സൗകര്യങ്ങളൊന്നും അത്യാവശ്യമായി​ അവർക്ക് തോന്നി​യി​ട്ടുമി​ല്ല