കോഴിക്കോട് : 2021ലെ ഫുജൈറ ഹോളി ഖുർആൻ അന്താരാഷ്ട്ര ഇസ്ലാമിക വ്യക്തിത്വ പുരസ്കാരം ഇന്ത്യൻ ഗ്രാൻഡ് മുഫ്തിയും ശൈഖ് സായിദ് ഇന്റർ നാഷണൽ പീസ് ഫോറം ചെയർമാനുമായ കാന്തപുരം എ.പി അബൂബക്കർ മുസ‌്ലിയാർക്ക്. ഫുജൈറ കിരീടവകാശി ശൈഖ് മുഹമ്മദ് ബിൻ അഹമ്മദ് ബിൻ ശർഖിയുടെ നേതൃത്വത്തിൽ പ്രവർത്തിക്കുന്ന ഫുജൈറ സോഷ്യൽ ആൻഡ് കൾച്ചറൽ അസോസിയേഷൻ സംഘടിപ്പിക്കുന്ന ഫുജൈറ ഹോളി ഖുർആൻ പാരായണ പരിപാടിയുടെ ഭാഗമായി ഏർപ്പെടുത്തിയതാണ് പുരസ്കാരം.
വിദ്യാഭ്യാസ-സമാധാന-ജീവകാരുണ്യ മേഖലകളിൽ ഇന്ത്യ-യു.എ.ഇ സൗഹാർദം സജീവമാക്കുന്നതിൽ കഴിഞ്ഞ 50 വർഷത്തെ കാന്തപുരം എ.പി അബൂബക്കർ മുസ്‌ലിയാരുടെ പ്രവർത്തനങ്ങൾ പരിഗണിച്ചാണ് പുരസ്‌കാരത്തിന് തിരഞ്ഞെടുത്തതെന്ന് ഫുജൈറ സോഷ്യൽ ആൻഡ് കൾച്ചറൽ അസോസിയേഷൻ പ്രസിഡന്റ് ഹിസ് എക്‌സ്ലെൻസി ഖാലിദ് അൽ ദൻഹാനി പറഞ്ഞു.