കുറുപ്പന്തറ : കൊവിഡ് ബാധിതർക്കായി മേമ്മുറി ഗവ.എൽ.പി സ്‌കൂളിൽ ആരംഭിച്ച ഡൊമിസിലിയറി സെന്ററിൽ അഡ്വ. മോൻസ് ജോസഫിന്റെ നേതൃത്വത്തിൽ ജനപ്രതിനിധികൾ സന്ദർശനം നടത്തി. കൊവിഡ് രോഗബാധിതർക്ക് ചികിത്സയും, സഹായവും നൽകുന്നതിന് എം.എൽ.എ ഹെൽപ്പ് ഡെസ്‌കിന്റെ പ്രവർത്തനം കടുത്തുരുത്തി നിയോജക മണ്ഡലത്തിൽ കൂടുതൽ യുവാക്കളെയും, പൊതു പ്രവർത്തകരെയും ഉൾപ്പെടുത്തി വിപുലീകരിക്കുമെന്ന് എം.എൽ.എ അറിയിച്ചു. മാഞ്ഞൂർ സർവീസ് സഹകരണ ബാങ്കിന്റെ എല്ലാവിധ സഹായവും കൊവിഡ് പ്രതിരോധ പ്രവർത്തനങ്ങളിൽ ലഭ്യമാക്കുമെന്ന് ബാങ്ക് പ്രസിഡന്റ് ലൂക്കോസ് മാക്കീൽ വ്യക്തമാക്കി. സുനു ജോർജ്, ജോൺ നീലംപറമ്പിൽ, സി.എം ജോർജ്, സണ്ണി മണിത്തൊട്ടിൽ, സാലിമ്മ ജോളി, ടോമി കാറുകുളം, ബിനോ സഖറിയ എന്നിവർ ഒപ്പമുണ്ടായിരുന്നു.