കോട്ടയം : തദ്ദേശസ്ഥാപന തലത്തിൽ ഓറഞ്ച് ബുക്ക് അടിസ്ഥാനമാക്കിയുള്ള കാലവർഷ ദുരന്തനിവാരണ സംവിധാനങ്ങൾ പൂർണ സജ്ജമാണെന്ന് ഉറപ്പുവരുത്തണമെന്ന് മന്ത്രി വി.എൻ. വാസവൻ നിർദേശിച്ചു.

ദുരന്തം ബാധിക്കാൻ കൂടുതൽ സാധ്യതയുള്ള സ്ഥലങ്ങളെയും മുൻഗണനാ പട്ടികയിലുള്ള ജനവിഭാഗങ്ങളെയും സംബന്ധിച്ച വിവരങ്ങൾ ശേഖരിക്കുകയും അടിയന്തര സാഹചര്യത്തിൽ ഇവരെ സുരക്ഷിത സ്ഥാനത്തേക്ക് മാറ്റുന്നനും ക്രമീകരണങ്ങൾ ചെയ്യണം. ഒഴിപ്പിക്കൽ ആവശ്യമായിവരുന്ന സാഹചര്യത്തിൽ ഈ വിഭാഗങ്ങളിൽപെട്ടവർക്ക് ആദ്യ പരിഗണന നൽകണം. ക്യാമ്പുകൾ സജ്ജീകരിക്കുമ്പോൾ കൊവിഡ് പ്രതിരോധ മുൻകരുതലുകൾ പാലിക്കണം. ക്വാറന്റൈനിൽ കഴിയുന്നവർക്കും മറ്റ് ആളുകൾക്കുമായി ക്യാമ്പുകൾ സജ്ജീകരിക്കണം. വീടുകളിൽ കഴിയുന്ന കൊവിഡ് രോഗികൾക്ക് കൊവിഡ് ചികിത്സാ കേന്ദ്രങ്ങളിൽ സൗകര്യമൊരുക്കണം. മരങ്ങളും ശിഖരങ്ങളും വൈദ്യുതി കമ്പികളും വീണ് അപകടം ഉണ്ടാകാനുള്ള സാദ്ധ്യതകൾ ഒഴിവാക്കണം. ഓടകളിലെയും നദികളിലെയും തടസങ്ങൾ നീക്കം ചെയ്യണമെന്നും മന്ത്രി പറഞ്ഞു.