കോട്ടയം : ജില്ലാ ആയുർവേദ ആശുപത്രിയിൽ കൊവിഡ് വാർ റൂമിന്റെ ഉദ്ഘാടനം ജില്ലാ പഞ്ചായത്ത് പ്രസിഡന്റ് നിർമ്മല ജിമ്മി നിർവഹിച്ചു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്‌സൺ പി.എസ്.പുഷ്പമണി അദ്ധ്യക്ഷത വഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്‌സൺ മഞ്ജു സുജിത്ത്, ആയുർവേദ ഡി.എം.ഒ. ഡോ. സി.ജയശ്രീ, ആശുപത്രി സി.എം.ഒ ആർ.വി.അജിത്ത്, ഡി.എസി.ആർ.സി കൺവീനർ ഡോ.ജുവൽ ജോസ് തുടങ്ങിയവർ പങ്കെടുത്തു. ജില്ലയിലെ 71 പഞ്ചായത്തുകളിലും മുനിസിപ്പാലിറ്റികളിലുമായി 80 ആയുർവേദ ഡിസ്‌പെൻസറി വഴി കൊവിഡാനന്തര ചികിത്സ നൽകുകയാണ് പദ്ധതിയുടെ ഉദ്ദേശം. കൊവിഡ് വന്നവർക്കുള്ള ഔഷധം നൽകുന്ന ഭൈഷജ്യം പദ്ധതിയും, രോഗം ഭേദം പോയവർക്കുള്ള ഔഷധങ്ങൾ നൽകുന്ന പുനർജനി പദ്ധതിയും വോളന്റിയർമാർ വഴിയും ആർ.ടി.ടി വഴിയും എത്തിച്ചുകൊടുക്കും. ഓരോ ദിവസവും ലഭിക്കുന്ന 50 പേരോളം വരുന്ന ലിസ്റ്റിൽ നിന്ന് ആയുർവേദ ഔഷധം കഴിക്കാൻ താത്പര്യമുള്ളവരെ ഫോണിലൂടെ ബന്ധപെട്ട് നിർദ്ദേശങ്ങൾ നൽകിയാണ് ഇവ നൽകുക. പത്തുപേരടങ്ങിയ സംഘം വാർറൂമിലുണ്ടാകും.