ഈരാറ്റുപേട്ട : മലങ്കരയിൽ നിന്ന് വെള്ളമെത്തിക്കുന്ന രാമപുരം കുടിവെള്ള പദ്ധതിയിൽ നിന്ന് മലയോര മേഖലകളായ മൂന്നിലവ്,തലനാട്,തീക്കോയി,തലപ്പലം എന്നീ പഞ്ചായത്തുകളെയും, ഈരാറ്റുപേട്ട മുനിസിപ്പാലിറ്റിയെയും ഒഴിവാക്കിയാൽ ശക്തമായ ജനകീയ പ്രക്ഷോഭം ആരംഭിക്കുമെന്ന് ജില്ലാ പഞ്ചായത്ത് അംഗം അഡ്വ.ഷോൺ ജോർജ് പറഞ്ഞു. ആദ്യം പദ്ധതിയിൽ ഈ പഞ്ചായത്തുകൾ ഉൾപ്പെട്ടിരുന്നില്ല. അതിനുശേഷം നിരവധി നിവേദനങ്ങളുടെയും പരിശ്രമങ്ങളുടെയും ഫലമായാണ് ഉൾപ്പെടുത്തിയത്. സർവേ നടപടികളും പൂർത്തിയായി. ജില്ലയിൽ ഏറ്റവുമധികം കുടിവെള്ള ക്ഷാമം നേരിടുന്ന പ്രദേശങ്ങളായ മേലുകാവ്, ഇരുമാപ്ര,വാളകം,മേച്ചാൽ, പാഴുക്കാക്കാനം, നെല്ലാപാറ,മങ്കൊമ്പ്, അടുക്കം,തലനാട്, വെള്ളികുളം ഉൾപ്പടെയുള്ള പ്രദേശങ്ങളെ പൂർണമായും ഉൾപ്പെടുത്തിയാണ് സർവേ പൂർത്തിയാക്കിയത്. കളത്തൂക്കടവ് വഴി തലപ്പലം പഞ്ചായത്തിലും, ഈരാറ്റുപേട്ട മുനിസിപ്പാലിറ്റിയിലും വെള്ളമെത്തിക്കുന്ന പദ്ധതിയാണ് തയ്യാറാക്കിയിരിക്കുന്നത്. എന്നാൽ പദ്ധതി അട്ടിമറിക്കുന്ന നിലപാടുകളാണ് പുറത്തുവരുന്നതെന്നും ഇത് അനുവദിക്കില്ലെന്നും ഷോൺ പറഞ്ഞു.