ചെന്നൈ: തമിഴ്‌നാട്ടിൽ വോട്ടെണ്ണൽ പുരോഗമിക്കുന്നു. നിലവിൽ 141 സീറ്റുകളിൽ ഡിഎംകെ മുന്നിലാണ്. 87 മണ്ഡലങ്ങളിൽ അണ്ണാഡിഎംകെയും ആറിടത്ത് മറ്റുളളവരും മുന്നിട്ടു നിൽക്കുന്നു.

കോയമ്പത്തൂർ സൗത്തിൽ കമൽഹാസൻ പിന്നിൽ. കോൺ​ഗ്രസ് സ്ഥാനാർത്ഥി മയൂര ജയകുമാറാണ് ഇവിടെ മുന്നിട്ടു നിൽക്കുന്നത്. ഡിഎംകെ സ്ഥാനാർത്ഥി എം കെ സ്റ്റാലിൻ പിന്നോട്ട് പോയപ്പോൾ ഉദയനിധി സ്റ്റാലിൻ ലീഡ് ചെയ്യുകയാണ്. തൗസന്റ് ലെെറ്റ്സിൽ ബിജെപി സ്ഥാനാർത്ഥി ഖുശ്ബു പിന്നിലാണ്. ഇവിടെ ഡി.എം.കെ സ്ഥാനാർത്ഥി ഏഴിലൻ ആണ് ലീഡ് ചെയ്യുന്നത്.

സംസ്ഥാനത്തെ 234 നിയമസഭാ മണ്ഡലങ്ങളിലേക്കും കന്യാകുമാരി ലോക്‌സഭാ മണ്ഡലത്തിലേക്കുമാണ് വോട്ടെടുപ്പ് നടന്നത്. ഡിഎംകെ വിജയിക്കുമെന്നാണ് എക്സിറ്റ് പോളുകളുടെ പ്രവചനം. എന്നിരുന്നാലും കഴിഞ്ഞ തിരഞ്ഞെടുപ്പിൽ എട്ടിൽ അഞ്ച് എക്‌സിറ്റ് പോളുകളുടെ ഫലങ്ങളും നിഷ്പ്രഭമാക്കി നേടിയ വിജയത്തിലാണ് അണ്ണാഡിഎംകെയുടെ പ്രതീക്ഷ.