തിരുവനന്തപുരം: ബി.ജെ.പി ജില്ലാ നേതൃത്വത്തിനെതിരെ രൂക്ഷവിമർശനവുമായി തിരുവനന്തപുരം നിയമസഭാ മണ്ഡലത്തിലെ എൻ.ഡി.എ സ്ഥാനാർത്ഥി കൃഷ്ണകുമാർ. തന്റെ മണ്ഡലത്തിലെ പ്രചാരണത്തിൽ ജില്ലാ നേതൃത്വം വീഴ്ച കാണിച്ചു. പാര്‍ട്ടി വോട്ടുകള്‍ തനിക്ക് ലഭിച്ചില്ല. വിജയ സാദ്ധ്യത ബി.ജെ.പി. നേതൃത്വം ഒട്ടും ഉപയോഗിച്ചില്ലെന്നും കൃഷ്ണ കുമാര്‍ ഒരു വാർത്താ ചാനലിനോട് പറഞ്ഞു.
സമീപ മണ്ഡലങ്ങളിൽ കേന്ദ്ര നേതാക്കൾ പ്രചാരണത്തിനെത്തി. തന്റെ മണ്ഡലത്തിലേക്ക് അവർ എത്താതിന് കാരണം ജില്ലാ നേതൃത്വത്തിന്റ വീഴ്ചയാണ്. മണ്ഡലത്തിനകത്താണ് എയർപോർട്ട്. ദേശീയ നേതാക്കൻമാർ എല്ലാവരും ഇതിലൂടെയാണ് വരുന്നതും പോകുന്നതും. എന്നിട്ടും ആരും പ്രചാരണത്തിന് വന്നില്ലെന്നും കൃഷ്ണകുമാർ കുറ്റപ്പെടുത്തി.
സർവേ ഫലങ്ങൾ തനിക്ക് വിജയസാദ്ധ്യത പ്രവചിച്ചപ്പോൾ കുറച്ചുകൂടി ഉണർന്ന് പ്രവർത്തിക്കണമായിരുന്നു. ഒരു കലാകാരൻ എന്ന നിലയ്ക്ക് വ്യക്തിപരമായ വോട്ടുകൾ ധാരാളം ഉണ്ടാകും. അതിന്റെ കൂടെ പാർട്ടി വോട്ടുകൾ കൂടെ ഉണ്ടായിരുന്നെങ്കിൽ വിജയ സാദ്ധ്യത ഉറപ്പായിരുന്നുവെന്നും കൃഷ്ണകുമാർ പറഞ്ഞു. അതേസമയം, പാർട്ടി അവസരം തന്നാൽ ഇനിയും ഇതേ മണ്ഡലത്തിൽ തന്നെ മത്സരിക്കുമെന്നും അദ്ദേഹം വ്യക്തമാക്കി.