ന്യൂഡൽഹി: രാജ്യത്ത് കൊവിഡ് വ്യാപനത്തിൽ നേരിയ കുറവെന്ന് ആരോഗ്യ മന്ത്രാലയം. ചില സംസ്ഥാനങ്ങളിൽ കൊവിഡ് രണ്ടാം തരംഗം നിയന്ത്രിക്കാവുന്ന രീതിയിലേക്കെത്തുകയാണെന്നും ആരോഗ്യമന്ത്രാലയം പറയുന്നു. നാല് സംസ്ഥാനങ്ങളിൽ ടെസ്റ്റ് പോസിറ്റിവിറ്റി നിരക്ക് അ‌ഞ്ച് ശതമാനത്തിൽ താഴെയായത് ആരോഗ്യമന്ത്രാലയം ചൂണ്ടിക്കാട്ടുന്നു.
ഡൽഹി, മഹാരാഷ്ട്ര, മദ്ധ്യപ്രദേശ് തുടങ്ങി രോഗവ്യാപനം തീവ്രമായിയിരുന്ന പത്ത് സംസ്ഥാനങ്ങളിൽ രോഗ വ്യാപനം കുറയുന്നുണ്ട്. അതേസമയം, കേരളം, തമിഴ്‌നാട്, കർണാടക എന്നീ സംസ്ഥാനങ്ങളിൽ രോഗ വ്യാപനം കൂടുകയാണെന്നും ആരോഗ്യ മന്ത്രാലയം വിശദീകരിച്ചു.
രാജ്യത്ത് ഓക്‌സിജൻ പ്രതിസന്ധി കുറഞ്ഞുവെന്നാണ് കേന്ദ്രസർക്കാർ പറയുന്നത്. ഓക്‌സിജൻ ആഭ്യന്തര ഉത്പാദനം കൂട്ടിയിരിക്കുകയാണ്. പ്രതിസന്ധി തടയാനായി ദ്രാവക ഓക്‌സിജൻ ഇറക്കുമതി ചെയ്‌തുവെന്നും ആരോഗ്യമന്ത്രാലയം വിശദീകരിച്ചു.