കാസർകോട്: ജില്ലയിലെ ഭിന്നശേഷിക്കാരായ കുട്ടികൾക്കായി ടെലി റിഹാബിലിറ്റേഷനും ഓൺലൈൻ തെറാപ്പി സൗകര്യവും ഏർപ്പെടുത്തി.കൊവിഡ് സാഹചര്യത്തിൽ വീടുകളിൽ കഴിയുന്ന ഭിന്നശേഷികുട്ടികൾക്ക് തുടർ പരിശീലനവും കരുതലും ഉറപ്പു വരുത്തുന്നതിന്റെ ഭാഗമായി ജില്ലാ ഭരണകൂടവും സാമൂഹിക നീതി വകുപ്പും അക്കര ഫൗണ്ടേഷനുമായി സഹകരിച്ചു കൊണ്ടാണ് ഇന്നു മുതൽ ടെലി റിഹാബ് സംവിധാനം നടത്തുക.
ജില്ലാ കളക്ടർ ഡോ.ഡി.സജിത് ബാബു ഒാൺലൈനായി സംവിധാനം ഉദ്ഘാടനം ചെയ്തു.ജില്ലാ സാമുഹിക നീതി ഓഫീസർ ഷീബാ മുംതാസ് അധ്യക്ഷത വഹിച്ചു.
ഭിന്നശേഷി മേഖലയിൽ പ്രവർത്തിക്കുന്ന ഫിസിയോതെറാപ്പിസ്റ്റ്, സ്പീച്ച് തെറാപ്പിസ്റ്റ്, ഒക്യൂപേഷൻ തെറാപ്പിസ്റ്റ്, സൈക്കോളോജിസ്റ്റ്, സ്‌പെഷ്യൽ എജക്കേറ്റർ, സോഷ്യൽ വർക്കർ എന്നീ പ്രൊഫഷണലുകളെ ഉപയോഗപ്പെടുത്തി കുട്ടികളുടെ പരിമിതി, വയസ്സ്, ആവശ്യം എന്നിവ അടിസ്ഥാനപ്പെടുത്തി വീട്ടിൽ ചെയ്യേണ്ട നിർദേശങ്ങളാണ് ആദ്യ ഘട്ടത്തിൽ നൽകുന്നത്. തുടർന്ന് അവർക്കാവശ്യമായ വർക്ക്ഷീറ്റ്, ഡെമോ വീഡിയോ, ഓൺലൈൻ തെറാപ്പി എന്നിവയുംനൽകും.