ജനീവ: വളരെ കൂടുതൽ സമയം ജോലി ചെയ്യുന്നുണ്ടെങ്കിൽ മരണം വരെ സംഭവിക്കുമെന്ന്​ ലോകാരോഗ്യ സംഘടനയുടെ മുന്നറിയിപ്പ്​.

മരിച്ചവരിൽ കൂടുതലും മദ്ധ്യവയസ്​കരോ വൃദ്ധരോ ആയ പുരുഷന്മാരാണ്​.

ഒരാഴ്ചയിൽ 55 മണിക്കൂറും അതിൽ കൂടുതലും ജോലിയെടുക്കുന്നത്​ ഗുരുതരമായ ആരോഗ്യ പ്രശ്​നമുണ്ടാക്കുമെന്ന്​ ലോകാരോഗ്യ സംഘടന പരിസ്ഥിതി, ആരോഗ്യ വിഭാഗം ഡയറക്​ടർ മരിയ നെയ്​റ പറഞ്ഞു

ചെറുപ്പത്തിൽ അധിക ജോലിയോട് പൊരുത്തപ്പെടാൻ ശരീരത്തിനാകുമെങ്കിലും പിന്നീട്​ അത് അസാദ്ധ്യമാകും. അതോടെയാണ്​ മരണം വരെ സംഭവിക്കുന്നത്​. . ചൈന, ജപ്പാൻ, തുടങ്ങിയ രാജ്യങ്ങൾ ഉൾപെടുന്ന തെക്കു കിഴക്കൻ ഏഷ്യ, പശ്​ചിമ പസഫിക്​ മേഖലകളിലുള്ളവരിലാണ്​ പ്രശ്​നം കൂടുതലായി കണ്ടത്​.

ഒരാഴ്ചയിൽ 55 മണിക്കൂറിൽ കൂടുതൽ ജോലി​ ചെയ്യുന്നത്​ മസ്​തിഷ്​കാഘാതത്തിന്​ 35 ശതമാനവും ​ഹൃദ്രോഗത്തിന്​ 17 ശതമാനവും അധിക സാദ്ധ്യതയുണ്ടാക്കുമെന്നും റിപ്പോർട്ട്​ വ്യക്​തമാക്കുന്നു. 2000- 16 വർഷങ്ങൾക്കിടയിലെ കണക്കുകളാണ്​ സംഘടന പരിശോധിച്ചത്​.

കൊവിഡ് കാലത്ത്​ ജോലി സമയം പല വിഭാഗങ്ങൾക്കും ഏറെ കൂടുതലായതിനാൽ കരുതൽ​ വേണമെന്ന്​ ലോകാരോഗ്യ സംഘടന മേധാവി ടെഡ്രോസ് അദാനോം ഗെബ്രിയേസിസ്​ പറഞ്ഞു.

@ 2016 ൽ 745,000 പേർ മരിച്ചു

@ മരണകാരണം - മസ്​തിഷ്​കാഘാതം, ഹൃദയാഘാതം