കിളിമാനൂർ: സത്യവാങ്മൂലം കൈയിലില്ലാതെ ഇരുചക്രവാഹനത്തിലെത്തിയയാളെ പൊലീസ് പിടികൂടി തിരിച്ചയച്ചു. ഇരുചക്രവാഹനവും പിടിച്ചെടുത്തു. കാൽനടയായി തിരിച്ചെത്തിയ ഇദ്ദേഹം വീട്ടിൽ കുഴഞ്ഞുവീണ് മരിച്ചു.നഗരൂർ, കടവിള കൊടിവിള വീട്ടിൽ സുനിൽകുമാർ (56) ആണ് കുഴഞ്ഞുവീണ് മരിച്ചത്. ഇദേഹം ഹൃദയസംബന്ധമായ അസുഖത്തിന് ചികിത്സയിലായിരു ന്നു. ശനിയാഴ്ചയാണ് സംഭവം. രാവിലെ 8.30 മണിയോടെ നഗരൂർ ആൽത്തറമൂട് ജംഗ്ഷനിലെ കടയിൽ നിന്നു പഴം വാങ്ങി നിൽക്കവേയാണ് നഗരൂർ പൊലീസ് സുനിൽകുമാറിനെ പിടികൂടിയത്.

സത്യവാങ്മൂലം ഇല്ലാത്തതിനാൽ ഇരുചക്രവാഹനം കസ്റ്റഡിയിലെടുത്ത ശേഷം വിട്ടയച്ചു. രണ്ടുകിലോമീറ്ററിലേറെ നടന്ന് വീട്ടിലെത്തിയ ഇയാൾ കുഴഞ്ഞ് വീഴുകയായിരുന്നു. തുടർന്ന് കാരേറ്റ് സ്വകാര്യ ആശുപത്രിയിലെത്തിച്ചെങ്കിലും മരണം സംഭവിച്ചു. സുനിൽകുമാർ മരുന്നുവാങ്ങാനായി മെഡിക്കൽ സ്റ്റോറിലേക്ക് പോയതാണെന്ന് പറയപ്പെടുന്നു. സിദ്ധാർത്ഥ് ഏക മകനാണ്.