തെലുങ്ക് സൂപ്പർതാരം അല്ലു അർജുന് ഈയിടെ കൊവിഡ് സ്ഥിരീകരിച്ചിരുന്നു. വീട്ടിൽ തന്നെ ചികിത്സയിൽ കഴിഞ്ഞ് രോഗമുക്തി നേടി ഷൂട്ടിംഗിന് എത്തിയ താരം ആദ്യം ചെയ്‌തത് തന്റെ ജീവനക്കാർക്കെല്ലാം വാക്‌സിൻ നൽകുന്നതാണ്.

45 വയസിന് മുകളിലുള‌ള തന്റെ ജീവനക്കാർക്കെല്ലാം അല്ലു വാക്‌സിനേഷൻ ഉറപ്പ് വരുത്തി. വേണ്ട ക്രമീകരണങ്ങൾ താരം തന്നെ മുൻകയ്യെടുത്താണ് നടത്തിയത്.

സുകുമാർ സംവിധാനം ചെയ്യുന്ന പുഷ്‌പയാണ് അല്ലുവിന്റെ പുതിയ സിനിമ. മലയാളത്തിന്റെ സ്വന്തം ഫഹദ് ഫാസിലാണ് ചിത്രത്തിൽ വില്ലനായെത്തുന്നത്. രണ്ട് ഭാഗങ്ങളായാണ് ചിത്രം റിലീസ് ചെയ്യുന്നത്. ചിത്രത്തിന്റെ രണ്ടാം ഭാഗത്തിന്റെ പത്ത് ശതമാനത്തോളം ഷൂട്ടിങ്ങ് പൂർത്തികരിച്ചു. 250 കോടി രൂപ ചിലവിട്ടാണ് ചിത്രം ഒരുക്കുന്നത്. ഈ വർഷം ഒക്ടോബറിൽ ചിത്രത്തിന്റെ ആദ്യ ഭാഗം റിലീസ് ചെയ്യും. അടുത്ത ഘട്ടം 2022ൽ ആയിരിക്കുമെന്നാണ് റിപ്പോർട്ടുകൾ.

മൈത്രി മൂവി മേക്കേഴ്സിന്റെയും മുട്ടംസെട്ടി മീഡിയയുടെയും ബാനറിൽ നവീൻ യെർനേനിയും വൈ രവിശങ്കറും ചേർന്നാണ് പുഷ്പ നിർമിയ്ക്കുന്നത്. മിറോസ്ലോ കുബ ബറോസ്‌ക്കാണ് ചിത്രത്തിന്റെ ക്യാമറ. ദേവി ശ്രീ പ്രസാദാണ് ചിത്രത്തിന്റെ സംഗീത സംവിധാനവും സൗണ്ട് ട്രാക്കും നിർവഹിയ്ക്കുന്നത്. റസൂൽ പൂക്കുട്ടി സൗണ്ട് എൻജിനീയറാകുന്ന ചിത്രത്തിന് വേണ്ടി ചിത്രസംയോജനം നടത്തുന്നത് കാർത്തിക് ശ്രീനിവാസ് ആണ്.