സംസ്ഥാനത്തെ നിയുക്ത ആരോ​ഗ്യ മന്ത്രി വീണാ ജോർജിനെ തന്റെ സിനിമയിൽ അഭിനയിക്കാൻ ക്ഷണിച്ചിരുന്നതായി സംവിധായകൻ ജൂഡ് ആന്റണി ജോസഫ്. ഓം ശാന്തി ഓശാനയിലെ വൈൻ ആന്റി ആകാൻ താൻ മനസിൽ ആഗ്രഹിച്ചത് മാമിന്റെ മുഖമാണ്. അന്ന് ഇന്ത്യാ വിഷനിൽ ജോലി ചെയ്യുകയായിരുന്ന വീണയെ കണ്ട് കഥ പറഞ്ഞിരുന്നു. എന്നാൽ സ്നേഹപൂവ്വം അവരത് നിരസിച്ചെന്നും ജൂഡ് ഫേസ്ബുക്കിൽ കുറിച്ചു. ഒപ്പം കേരളത്തിലെ നിയുക്ത ആരോ​ഗ്യമന്ത്രിക്ക് അഭിനന്ദനങ്ങളെന്നും മികച്ച പ്രവർത്തനം കാഴ്ച വയ്ക്കാനാകട്ടെയെന്നും അദ്ദേഹം ആശംസിച്ചു.

ജൂഡ് ആന്റണി ജോസഫിന്റെ ഫേസ്ബുക്ക് പോസ്റ്റ്

ഓം ശാന്തി ഓശാനയിലെ വൈൻ ആന്റി ആകാൻ ഞാൻ മനസ്സിൽ ആഗ്രഹിച്ചത് ഈ മുഖമാണ്. അന്ന് മാം ഇന്ത്യ വിഷനിൽ ജോലി ചെയ്യുന്നു. അന്ന് നമ്പർ തപ്പിയെടുത്തു വിളിച്ചു കാര്യം പറഞ്ഞു. നേരെ ഇന്ത്യാ വിഷനിൽ ചെന്ന് കഥ പറഞ്ഞു. അന്ന് ബോക്സ് ഓഫിസ് എന്ന പ്രോഗ്രാം ചെയ്യുന്ന മനീഷേട്ടനും ഉണ്ടായിരുന്നു കഥ കേൾക്കാൻ, എന്റെ കഥ പറച്ചിൽ ഏറ്റില്ല. സ്നേഹപൂർവ്വം അവരതു നിരസിച്ചു. അന്ന് ഞാൻ പറഞ്ഞു ഭാവിയിൽ എനിക്ക് തോന്നരുതല്ലൊ അന്ന് പറഞ്ഞിരുന്നെങ്കിൽ, മാം ആ വേഷം ചെയ്തേനെ എന്ന് . ഇന്ന് കേരളത്തിന്റെ നിയുക്ത ആരോഗ്യമന്ത്രി . പൂജയുടെ ജനിക്കാതെ പോയ വൈൻ ആന്റി. അഭിനന്ദനങ്ങൾ മാം. മികച്ച പ്രവർത്തനം കാഴ്ച വക്കാനാകട്ടെ