കൊച്ചി: പാർട്ടി ഏൽപ്പിച്ചിരിക്കുന്നത് വലിയ ഉത്തരവാദിത്തമെന്ന് നിയുക്തമന്ത്രി പി രാജീവ്. പാർട്ടി ഏൽപ്പിച്ച ചുമതലകൾ എല്ലാ ഘട്ടങ്ങളിലും നിർവഹിച്ചിട്ടുണ്ട്. അനുഭവ സമ്പന്നരുമായി ആശയ വിനിമയം നടത്തി മുന്നോട്ട് പോകുമെന്നും പി രാജീവ് മാദ്ധ്യമങ്ങളോട് പറഞ്ഞു.

ഇടതുമുന്നണി ജനങ്ങളുടെ മുന്നിൽ വച്ച പ്രകടനപത്രികയിലെ വാഗ്‌ദ്ധാനങ്ങൾ നടപ്പിലാക്കുന്നതിനും സമയബന്ധിതമായി പൂർത്തിയാക്കുന്നതിനുമായിരിക്കും ശ്രമം. എല്ലാ പ്രതിസന്ധി ഘട്ടങ്ങളിലൂടെയും സർക്കാരിനെ നയിച്ച പിണറായിക്കൊപ്പം പ്രവർത്തിക്കാൻ കഴിയുന്നു എന്നത് തന്നെ വലിയ അനുഭവമാണെന്നും രാജീവ് വ്യക്തമാക്കി.

എറണാകുളം ജില്ലയുടെ താത്പര്യത്തിനും കേരളത്തിലെ വ്യവസായ വികസനത്തിനും വേണ്ടി പ്രവർത്തിക്കും. വകുപ്പുകൾ ഏതൊക്കെയാണെന്ന് മുഖ്യമന്ത്രിയാണ് തീരുമാനിക്കുന്നത്. ഇതുവരെ വകുപ്പ് സംബന്ധിച്ച ഔദ്യോഗിക അറിയിപ്പൊന്നും കിട്ടിയിട്ടില്ലെന്നും രാജീവ് കൂട്ടിച്ചേർത്തു.