ന്യൂക്: ആർട്ടിക്​ മേഖലയിലെ ഗ്രീൻലാൻഡിലെ ഉറഞ്ഞുകിടക്കുന്ന മഞ്ഞുമലകൾ അനിയന്ത്രിതമായി ഉരുകിയൊലിക്കുന്നുണ്ടെന്ന റിപ്പോ‌ർട്ടുമായി കോപൻഹേഗൻ സർവകലാശാലയിലേയും നോർവെയിലെ ആർട്ടിക്​ സർവകലാശാലയിലേയും ഗവേഷകർ. ഈ മഞ്ഞുരുക്കം ലോകത്തെയാകെ പ്രളയത്തിൽ മൂടുമെന്നും ഗവേഷകർ മുന്നറിയിപ്പ് നൽകി.

ഗ്രീൻലാൻഡിലെ 17 ലക്ഷം ചതുരശ്ര കിലോമീറ്ററിൽ വ്യാപിച്ചുകിടക്കുന്ന മഞ്ഞുപാളി അതിവേഗം ഉരുകുകയാണെന്നാണ് ഗവേഷകർ പറയുന്നു. ഇതേ വേഗതയിൽ മഞ്ഞുരുകിയാൽ 80 വർഷത്തിനകം കടൽ 1.2 മീറ്റർ ഉയരുമെന്നാണ്​ പഠന ശേഷം പുറത്തുവിട്ട റിപ്പോർട്ടിൽ​ ചൂണ്ടികാണിക്കുന്നത്​. കടൽ രണ്ടു മീറ്റർ‌ ഉയർന്നാൽ, മാലദ്വീപും ബംഗ്ലാദേശുമെല്ലാം വെള്ളത്തിനടിയിലാകും.

മഞ്ഞുപാളി പൂർണമായും ഉരുകിയാൽ കടൽ എഴു മീറ്ററോളം ഉയരും. 900 വർഷങ്ങൾകൊണ്ട്​ അതും സംഭവിക്കുമെന്നും​ പഠനത്തിൽ പറയുന്നു. ഇത് മനുഷ്യരുടെ നിലനിൽപ്പിന് തന്നെ ഭീഷണിയായേക്കാം.

@1880 മുതൽ ഗ്രീൻലാൻഡിലെ മഞ്ഞുരുക്കം സംഭവിക്കുന്നുണ്ടെന്നാണ്​ പഠന റിപ്പോർട്ടിലുള്ളത്​. വ്യവസായ വിപ്ലവത്തിന്​ ശേഷമുള്ള ആഗോളതാപനം പ്രകൃതിയ്ക്ക് ദോഷമുണ്ടാക്കി​. ഫോസിൽ ഇന്ധനങ്ങളുടെ ഉപയോഗവും കാർബൺഡൈ ഓക്​സൈഡിന്റെ പുറം തള്ളലും ആഗോള താപനത്തെ അതിവേഗത്തിലാക്കി. ആഗോളതാപനം നിയന്ത്രിച്ചാൽ പോലും മഞ്ഞുരുക്കം ഉടനെയൊന്നും തടയാനാകില്ലെന്നാണ്​ ഗവേഷകർ പറയുന്നത്​.

മഞ്ഞുരുക്കം മൺസൂൺ പ്രദേശങ്ങളിലും നാശം വിതക്കാൻ കാരണമാകുമെന്ന മുന്നറിയിപ്പ്​ പഠനം നടത്തിയവർ നൽകുന്നുണ്ട്​. കേരളം പോലുള്ള തീര പ്രദേശങ്ങൾ ഇതിന്റെ ഫലങ്ങൾ നേരിടേണ്ടി വരും.

@ അപകടത്തിൽ ഇന്ത്യയും

കടലിലെ ജല നിരപ്പുയർന്നാൽ അപകടത്തിലാകുന്ന രാജ്യങ്ങളുടെ പട്ടികയിൽ​ ഇന്ത്യയിലുമുണ്ട്. ഷാങ്​ഹായി, ലണ്ടൻ, ഫ്ലോറിഡ തുടങ്ങിയ നഗരങ്ങളും ഭീഷണിയിലാകും.