തിരുവനന്തപുരം: കേരളത്തിലെ ഏറ്റവും പ്രായം കുറഞ്ഞ വനിതാ കൊമേഴ്സ്യൽ പെെലറ്റ് എന്ന പദവി ഇനി ജെനി ജെറോമിന് സ്വന്തം. ഇന്നു രാത്രി ഷാർജയിൽ നിന്നും തിരുവനന്തപുരത്തേക്ക് തിരിക്കുന്ന എയർ അറേബ്യ വിമാനം അറബിക്കടലിനു മുളിലൂടെ പറക്കുമ്പോൾ കേരളത്തിന്റെ തിരദേശ മേഖലയ്ക്കും അഭിമാനിക്കാം. എയർ അറേബ്യയുടെ കോക്പിറ്റിനുള്ളിൽ സഹ‌പൈലറ്റായി വിമാനം നിയന്ത്രിക്കുന്ന ജെനി തെക്കൻ തിരുവനന്തപുരത്തെ കൊച്ചുതുറ എന്ന തീരദേശഗ്രാമത്തിൽ നിന്നാണ് ഈ നേട്ടം കെെപ്പിടിയിൽ ഒതുക്കിയിരിക്കുന്നത്.

കരുംകുളം കൊച്ചുതുറ സ്വദേശി ജെറോം ജോറിസിന്റെ മകളാണ് ജെനി. രണ്ട് വർഷം മുൻപ് പരിശീലനത്തിനിടെ ഒരു അപകടമുണ്ടായെങ്കിലും ജെനിക്കോ അവളുടെ സ്വപ്നത്തിനൊ ഒന്നും സംഭവിച്ചില്ല. കോപൈലറ്റായുള്ള ജെനിയുടെ ആദ്യ യാത്ര തിരുവനന്തപുരത്തേക്കാണ് എന്നതും പ്രത്യേകതയാണ്‌. ഇന്ന് ഷാർജയിൽ നിന്നും തിരുവനന്തപുരത്തേക്കുള്ള എയർ അറേബ്യ വിമാനത്തിൻ്റെ സഹപെെലറ്റായി തിരുവനന്തപുരത്തേക്ക് യാത്ര തിരിക്കുകയാണ് ജെനി.

എട്ടാം ക്ലാസിൽ പഠിക്കുമ്പോഴാണ് ജെനിക്ക് ഇങ്ങനൊരു മോഹം ഉദിച്ചത്. മനസിൽ കൊണ്ടുനടന്ന ആ​ഗ്രഹം പ്ലസ്ടു കഴിഞ്ഞപ്പോൾ അവൾ തുറന്നുപറഞ്ഞു. 'നീ പെൺകുട്ടിയല്ലേ, പൈലറ്റാകാനോ?' തുടങ്ങിയ പതിവ് ചോദ്യങ്ങളൊന്നും അവളെ തളർത്തിയില്ല. ആ നിശ്ചയദാർഢ്യം ജെനിയെ ഇന്ന് കോക്ക്പിറ്റിൽ എത്തിച്ചു. ജെനിയെ അഭിനന്ദിച്ച് നിരവധിപ്പോരാണ് സോഷ്യൽ മീഡിയയിലൂടെ രം​ഗത്തെത്തിയിരിക്കുന്നത്. കോൺ​ഗ്രസ് നേതാവും മുൻ എം.എൽ.എയുമായ കെ.എസ്. ശബരിനാഥനും ജെനിയെ അഭിനന്ദിച്ച് ഫേസ്ബുക്കിലൂടെ രംഗത്തെത്തി.