തിരുവനന്തപുരം: മഹിളാ കോണ്‍ഗ്രസ് മുന്‍ അദ്ധ്യക്ഷ ലതികാ സുഭാഷ് എൻ സി പിയിലേക്ക്. എൻ സി പി സംസ്ഥാന പ്രസിഡന്‍റ് പിസി ചാക്കോയുമായി ലതികാ സുഭാഷ് ചര്‍ച്ച നടത്തി. ഔദ്യോഗിക പ്രഖ്യാപനം ഉടൻ ഉണ്ടായേക്കും.
'പിസി ചാക്കോയുമായി പ്രാഥമിക ചർച്ചകൾ നടത്തിയിട്ടുണ്ട്. കുട്ടിക്കാലം തൊട്ട് കാണുന്ന കോണ്‍ഗ്രസ് നേതാവാണ് അദ്ദേഹം. ചര്‍ച്ചകള്‍ പുരോഗമിക്കുകയാണ്. സ്ഥാനമാനങ്ങൾ പ്രതീക്ഷിച്ചല്ല എൻ സി പിയിലേക്ക് പോകുന്നത്,കോണ്‍ഗ്രസ് പാരമ്പര്യമുള്ള പാര്‍ട്ടിയായതിനാലാണ്.'- ലതികാ സുഭാഷ് പറഞ്ഞു. അധികം വൈകാതെ കൂടുതൽ വിവരങ്ങൾ അറിയിക്കുമെന്നും അവർ കൂട്ടിച്ചേർത്തു.
നിയമസഭാ തിരഞ്ഞെടുപ്പിൽ കോൺഗ്രസ് സീറ്റ് നൽകാത്തതിൽ പ്രതിഷേധിച്ചാണ് ലതികാ സുഭാഷ് പാർട്ടിവിട്ടത്. തലമുണ്ഡനം ചെയ്തും അവർ പ്രതിഷേധിച്ചിരുന്നു. പിന്നാലെ ഏറ്റുമാനൂരില്‍ സ്വതന്ത്രയായി മത്സരിക്കുകയും, 7,624 വോട്ടുകൾ നേടുകയും ചെയ്തിരുന്നു.
പാര്‍ട്ടി വിരുദ്ധപ്രവര്‍ത്തനം നടത്തിയതിന് കോണ്‍ഗ്രസ് നേരത്തെ ലതികാ സുഭാഷിനെ പുറത്താക്കിയിരുന്നു. അതേസമയം ലതികാ സുഭാഷിനെ എ കെ ശശീന്ദ്രൻ പാർട്ടിയിലേക്ക് സ്വാഗതം ചെയ്തു. കോൺഗ്രസിൽ നിന്ന് വരുന്നവർക്ക് എൻ സി പി അർഹമായ പരിഗണന നൽകുമെന്ന് അദ്ദേഹം പറഞ്ഞു.