തിരൂർ: ട്രിപ്പിൾ ലോക്ക്ഡൗണിനിടെ കുതിരയുമായി സവാരിക്കിറങ്ങിയ ആളെ തിരിച്ചയച്ച് പൊലീസ്. മൂച്ചിക്കലിൽ ഇന്നലെ ഉച്ചയ്ക്കായിരുന്നു സംഭവം. വാഹന പരിശോധന നടത്തുകയായിരുന്ന താനൂർ പൊലീസിന്റെ മുന്നിലാണ് പെരുവഴിയമ്പലം സ്വദേശി കുതിരയുമായി എത്തിയത്.

ലോക്ക് ഡൗണിനിടയിൽ കുതിരയുമായി എങ്ങോട്ടാണെന്ന് പൊലീസ് ചോദിച്ചു. കുതിര വീട്ടിൽ നിൽക്കാൻ സമ്മതിക്കാത്തതിനാൽ അതിനെ പുറത്തിറക്കിയതാണ് എന്നായിരുന്നു മറുപടി. കുതിരയുടെ മാനസികോല്ലാസത്തിനു വേണ്ടിയാണ് സവാരി നടത്തിയതെന്നും ഇയാൾ പറഞ്ഞു.

മറുപടി കേട്ട് പൊലീസ് ആദ്യം ഒന്ന് അമ്പരന്നു. തുടർന്ന് മാനസകോല്ലാസമൊക്കെ സ്വന്തം പറമ്പിൽ നടത്തിയാൽ മതിയെന്നും, റോഡിൽ നടക്കില്ലെന്നും പറഞ്ഞ് പൊലീസുകാർ ഇയാളെ തിരിച്ചയക്കുകയായിരുന്നു.