ന്യൂഡൽഹി:ടൂൾ കിറ്റ് കേസുമായി ബന്ധപ്പെട്ട് ട്വിറ്റർ ഇന്ത്യയുടെ ഓഫീസുകളിൽ ഡൽഹി പൊലീസ് സ്‌പെഷ്യൽ സെല്ലിന്റെ പരിശോധന. ഗുഡ്‌ഗാവ്, ഡൽഹി ഓഫീസുകളിലാണ് പൊലീസ് പരിശോധന നടത്തിയത്. നേരത്തെ ബിജെപി വക്താവ് സാംബിത് പാത്ര 'കോൺഗ്രസ് ടൂൾ കിറ്റ്' എന്ന പേരിൽ പ്രചരിപ്പിച്ച കത്തിന് ട്വിറ്റർ മാനിപ്പുലേറ്റഡ് മീഡിയ ടാഗ് കൊടുത്തിരുന്നു. ഇതിൽ വിശദീകരണം ചോദിച്ച് സ്‌പെഷ്യൽ സെൽ ട്വിറ്റർ ഇന്ത്യയ്ക്ക് കത്തയച്ചിരുന്നു. ഇതിന് പിന്നാലെയാണ് ഓഫീസുകളിൽ പരിശോധന നടത്തിയത്.

പ്രധാനമന്ത്രി നരേന്ദ്രമോദിയുടെയും കേന്ദ്ര സർക്കാരിന്റെയും പ്രതിച്ഛായ മോശമാക്കാൻ കോൺഗ്രസ് ടൂൾകിറ്റ് ഉണ്ടാക്കി എന്ന ആരോപണമുന്നയിച്ചുള്ള ബിജെപി വക്താവ് സംബിത് പാത്രയുടെ ട്വീറ്റാണ് വ്യാജരേഖയാണെന്ന് ട്വിറ്റർ രേഖപ്പെടുത്തിയത്. കോൺഗ്രസിന്റെ ലെറ്റർ ഹെഡിലുള്ള ഒരു പ്രസ്താവനയുടെ ചിത്രമായിരുന്നു സംബിത് പാത്ര ട്വിറ്ററിൽ പങ്കുവച്ചത്.

'ബി.ജെ.പി വക്താവിന്റെ ട്വീറ്റ് വ്യാജമാണെന്ന് രേഖപ്പെടുത്തിയതിനെ കുറിച്ചാണ് ഡൽഹി പൊലീസ് അന്വേഷിക്കുന്നത്. ഇത് സംബന്ധിച്ച് ട്വിറ്ററിന്റെ കൈവശമുള്ള രേഖകൾ പരിശോധിക്കാനാണ് റെയ്ഡ് നടത്തിയത്.'ഡൽഹി പൊലീസ് പ്രസ്താവനയിൽ പറയുന്നു. എന്നാൽ പരാതിയെക്കുറിച്ചുള്ള കൂടുതൽ വിവരങ്ങൾ പുറത്തുവിടാൻ ഡൽഹി പൊലീസ് തയ്യാറായിട്ടില്ല. ആരോപണങ്ങൾ നിഷേധിച്ച് കോൺഗ്രസ് രംഗത്തുവന്നിരുന്നു.