കല്ലറ: വാമനപുരം എക്സൈസ് ഇൻസ്പെക്ടർ ജി. മോഹൻകുമാറിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിൽ പാങ്ങോട് ഗ്രാമപഞ്ചായത്ത് ഓഫീസിന് സമീപം പുരയിടത്തിൽ നിന്ന് കഞ്ചാവ് ചെടി കണ്ടെത്തി. ഷംസുദ്ദീൻ എന്നയാളുടെ പുരയിടത്തിൽ നിന്നാണ് 160 സെ.മീ ഉയരമുള്ള കഞ്ചാവ് ചെടി കണ്ടെത്തിയത്. ആരെയും പ്രതിസ്ഥാനത്ത് ചേർത്തിട്ടില്ലെങ്കിലും പ്രതിയെ കണ്ടെത്തുന്നതിനുള്ള അന്വേഷണം ആരംഭിച്ചതായി എക്സൈസ് ഇൻസ്‌പെക്ടർ അറിയിച്ചു. ലോക്ക്ഡൗൺ സ്പെഷ്യൽ എൻഫോഴ്സ്‌മെന്റ് പ്രവർത്തനങ്ങളുടെ ഭാഗമായി വ്യാജമദ്യ നിർമ്മാണം,​ വിതരണം,​ മയക്കുമരുന്ന് വില്പന എന്നിവയ്ക്കെതിരെ എക്സസൈസ് ശക്തമായ പരിശോധനകൾ ആരംഭിച്ചിട്ടുണ്ടെന്നും അധികൃതർ അറിയിച്ചു. വാമനപുരം റേഞ്ച് പരിധിയിൽ ഇത്തരത്തിലുള്ള കുറ്റങ്ങൾ ശ്രദ്ധയിൽപ്പെട്ടാൽ 04722837505, 9400069421 എന്നീ നമ്പരുകളിൽ അറിയിക്കണമെന്നും എക്സൈസ് ഇൻസ്പെക്ടർ പറഞ്ഞു. പരിശോധനയിൽ പ്രിവന്റീവ് ഓഫീസർ ബിനുതാജുദീൻ, സിവിൽ എക്സൈസ് ഓഫീസർമാരായ സ്നേഹേഷ്, അനീഷ്, ലിജി, എന്നിവർ പങ്കെടുത്തു.