റാന്നി : പുലിയെ പിടിയ്ക്കാൻ കൂട് വച്ച് വനം വകുപ്പ് ഉദ്യോഗസ്ഥർ. കരുമ്പൻ മൂഴി പനം കുടന്തയിലാണ് രണ്ട് ദിവസം മുമ്പ് നാട്ടുകാർ പുലിയെ കണ്ടതായി പറയുന്നത്. തുടർന്ന് വനം വകുപ്പ് ഉദ്യോഗസ്ഥർ ഇവിടെ കാമറ സ്ഥാപിക്കുകയും പട്രോളിംഗ് ശക്തമാക്കുകയും ചെയ്തിരുന്നു. നിയുക്ത എം എൽ എ പ്രമോദ് നാരായണൻ സ്ഥലത്തെത്തി ജനങ്ങളുടെ ഭീതി നേരിട്ട് മനസ്സിലാക്കുകയും പുലിയെ പിടിയ്ക്കാൻ അടിയന്തരമായി കൂട് സ്ഥാപിക്കാൻ നിർദേശം നൽകുകയും ചെയ്തു. എന്നാൽ സാധാരണ ഗതിയിൽ പുലിയുടെ കാൽപ്പാടുകൾ കാണാതെ കുട് വയ്ക്കാറില്ല. ജനവാസ മേഖലയിൽ ജനങ്ങളുടെ ജീവൻ പരീക്ഷണത്തിന് വിടാതെ എങ്ങനെയും പുലിയെ പിടിയ്ക്കാൻ കൂട് വയ്ക്കണമെന്ന് നിയുക്ത എം.എ.എ ഉന്നത ഉദ്യോഗസ്ഥർക്ക് നിർദേശം നൽകിയിരുന്നു. ഇതിന്റെ അടിസ്ഥാനത്തിലാണ് ഇപ്പോൾ കൂടെ സ്ഥാപിച്ചിരിക്കുന്നത്‌.