കോന്നി: സംസ്ഥാന ഡ്രഗ് കൺട്രോൾ ഡിപ്പാർട്ട്‌മെന്റ് കോന്നിയിൽ ആരംഭിക്കുന്ന
ഡ്രഗ് ടെസ്റ്റിംഗ് ലബോറട്ടറി നവംബറിൽ പ്രവർത്തനം ആരംഭിക്കും. ഡ്രഗ് കൺട്രോൾ ഡിപ്പാർട്ട്‌മെന്റിന്റെ സംസ്ഥാനത്തെ നാലാമത്തെ ലബോറട്ടറിയാണ് കോന്നിയിൽ ആരംഭിക്കുന്നത്. തിരുവനന്തപുരം, ഏറണാകുളം, തൃശൂർ എന്നിവിടങ്ങളിലാണ് നിലവിൽ ലബോറട്ടറി പ്രവർത്തിക്കുന്നത്. കോന്നി താലൂക്ക് അരുവാപ്പുലം പഞ്ചായത്തിൽ നെടുംപാറയിൽ ഗവ.മെഡിക്കൽ കോളേജിനു സമീപമുള്ള ഒരേക്കർ സ്ഥലത്താണ് ലാബ് നിർമ്മിച്ചിരിക്കുന്നത്. കെട്ടിട നിർമ്മാണം പൂർത്തിയായിട്ടുണ്ട്. ഇലക്ട്രിക്കൽ, ഇലക്ട്രോണിക്‌സ് ജോലികൾ പുരോഗമിക്കുകയാണ്. തുടർന്ന് ലാബ് സെറ്റിംഗും നടത്തേണ്ടതുണ്ട്.
3.8 കോടിയുടെ നിർമ്മാണ പ്രവർത്തനങ്ങൾ
ചീഫ് ഗവ.അനലിസ്റ്റായിരിക്കും ലാബിന്റെ മേലധികാരി. മൂന്നു നിലയിലായി നിർമ്മിക്കുന്ന 16000 സ്‌ക്വയർഫീറ്റ് വിസ്തീർണമുള്ള കെട്ടിടത്തിന്റെ നിർമ്മാണച്ചെലവ് 3.8 കോടി രൂപയാണ്. 60000 ലിറ്റർ സംഭരണ ശേഷിയുള്ള മഴവെള്ള സംഭരണിയും നിർമ്മാണം പൂർത്തിയായി.താഴെത്തെ നിലയിൽ അഡ്മിനിസ്‌ട്രേഷൻ വിഭാഗം, ലൈബ്രറി, സ്റ്റോർ, ഡയനിംഗ് ഹാൾ, കോൺഫറൻസ് ഹാൾ തുടങ്ങിയവയും, ഒന്നാം നിലയിലും, രണ്ടാം നിലയിലും ലബോറട്ടറിയുമാണ് നിർമ്മിക്കുന്നത്.
കേരളത്തിലെ ആദ്യ നോട്ടിഫൈഡ് ലാബ്
മെഡിക്കൽ ഉപകരണങ്ങളുടെ ക്വാളിറ്റി പരിശോധിക്കുന്ന കേരളത്തിലെ ആദ്യത്തെ നോട്ടിഫൈഡ് ലാബായാണ് കോന്നി മാറാൻ പോകുന്നത്. ഇൻസ്ട്രമെന്റേഷൻ, കെമിക്കൽ വിഭാഗങ്ങളിലായി നാല് ലാബുകളാണ് പ്രവർത്തനം ആരംഭിക്കുക. ഡ്രഗ്‌സ് കൺട്രോൾ ഡിപ്പാർട്ട്‌മെന്റിലെ എൻഫോഴ്‌സ്‌മെന്റ് വിഭാഗം വിവിധ സ്ഥലങ്ങളിൽ നിന്നു ശേഖരിക്കുന്ന അലോപ്പതി, ആയുർവേദ മരുന്നുകളും, കോസ്‌മെറ്റിക്‌സ് ഉൽപ്പന്നങ്ങളും ഈ ലാബിലാണ് പരിശോധിക്കുന്നത്.
നൂറ് പേർക്ക് തൊഴിൽ ലഭിക്കും
ലാബ് ആരംഭിക്കുന്നതോടെ നൂറിലധികം ജീവനക്കാർ ഇവിടെ ജോലിക്കായി എത്തും. ലബോറട്ടറികൾക്ക് അക്രഡിറ്റേഷൻ നല്കുന്ന നാഷണൽ അക്രഡിറ്റേഷൻ ബോർഡിൽ നിന്നും കോന്നി ലാബിന് നിർമ്മാണം അംഗീകാരം നേടിയെടുക്കേണ്ടതുണ്ട്. ഇതിനാവശ്യമായ പ്രവർത്തനം ഡ്രഗ് കൺട്രോളർ ഓഫീസ് നടത്തുകയാണ്. പുതിയ തസ്തിക അനുവദിക്കുന്നതിനുള്ള പ്രൊപ്പോസൽ സർക്കാരിൽ സമർപ്പിച്ചിട്ടുണ്ട്.
കേരളത്തിനു തന്നെ അഭിമാനമാകാൻ പോകുന്ന ഡ്രഗ് ടെസ്റ്റിംഗ് ലാബ് സമുച്ചയമാണ് കോന്നിയിൽ യാഥാർത്ഥ്യമാകാൻ പോകുന്നത്.പ്രവർത്തനങ്ങൾ കൃത്യ സമയത്ത് പൂർത്തീകരിക്കാനാവശ്യമായ കൂട്ടായ പ്രവർത്തനമാണ് നടത്തിയത്. അതിനാലാണ് ഇത്രയും വേഗം കെട്ടിട നിർമ്മാണം പൂർത്തിയാക്കാൻ കഴിഞ്ഞത്.
കെ.യു.ജനീഷ് കുമാർ (എം.എൽ.എ)