ശാസ്താംകോട്ട: അറ്റകുറ്റപ്പണിക്കിടെ വൈദ്യുതി പോസ്റ്റിൽ നിന്ന് വീണ് ശൂരനാട് ഇലക്ട്രിക്കൽ സെക്ഷനിലെ ജീവനക്കാരൻ മരിച്ചു. തെക്കൻ മൈനാഗപ്പള്ളി ജയാ നിവാസിൽ ജയകുമാറാണ് (42) മരിച്ചത്. ഇന്നലെ വൈകിട്ട് 5 മണിയോടെ എൽ.ടി ലൈനിൽ ജോലി ചെയ്യുന്നതിനിടെ ശൂരനാട് മറ്റത്ത് ജംഗ്ഷനിലായിരുന്നു അപകടം. ഉടൻ തന്നെ ഭരണിക്കാവിലെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൈനാഗപ്പള്ളി സെക്ഷനിൽ കരാർ വ്യവസ്ഥയിൽ മീറ്റർ റീഡറായി ജോലി ചെയ്തു വന്ന ജയകുമാർ രണ്ട് വർഷം മുമ്പാണ് വർക്കർ തസ്തികയിൽ പ്രവേശിച്ചത്.
കഴിഞ്ഞ ദിവസത്തെ മഴയിലും കാറ്റിലും ശൂരനാട് വടക്ക് പഞ്ചായത്തിൽ വൈദ്യുതി പോസ്റ്റുകൾ പിഴുതു വീഴുകയും ലൈനുകൾ പൊട്ടുകയും ചെയ്തിരുന്നു. ഇവിടത്തെ തകരാർ പരിഹരിക്കാനുള്ള ശ്രമങ്ങൾ നടക്കുന്നതിനിടെയാണ് അപകടം സംഭവിച്ചത്. ഭാര്യ: രമ്യ. മക്കൾ: ശ്രേയ, ശ്രേയസ്.