കൊല്ലം: പ്രതിവാര കൊവിഡ് വ്യാപനനിരക്ക് ഉയർന്ന തെക്കുംഭാഗം ഗ്രാമപഞ്ചായത്തിൽ
ട്രിപ്പിൾ ലോക്ക് ഡൗൺ ഏർപ്പെടുത്തി. ഇന്ന് രാവിലെ ആറ് മുതൽ അധിക നിയന്ത്രണം നിലവിൽ വരും.
ഭക്ഷ്യവസ്തുക്കൾ, പലവ്യഞ്ജനങ്ങൾ, പഴങ്ങൾ, പച്ചക്കറികൾ, പാൽ ഉത്പന്നങ്ങൾ, ഇറച്ചി, മീൻ, കാലിത്തീറ്റ,​ കോഴിത്തീറ്റ വിൽക്കുന്ന കടകൾ, ബേക്കറികൾ എന്നിവയ്ക്ക് രാവിലെ ഏഴ് മുതൽ ഉച്ചയ്ക്ക് രണ്ടുവരെ പ്രവർത്തിക്കാം.

പാൽ, പത്രം വിതരണം രാവിലെ 5നും 8നും ഇടയിലായിരിക്കണം. റേഷൻ കടകൾ, മാവേലി സ്റ്റോർ, സപ്ലൈകോ, പാൽബൂത്തുകൾ എന്നിവയ്ക്ക് രാവിലെ 8 മുതൽ വൈകിട്ട് 5 വരെ പ്രവർത്തിക്കാം. ഹോട്ടലുകൾക്കും റെസ്റ്റോറന്റുകൾക്കും രാവിലെ 7 മുതൽ വൈകിട്ട് 7.30 വരെ ഹോം ഡെലിവറിയായി പ്രവർത്തിക്കാം.

ഉപഭോക്താക്കൾ നേരിട്ട് പാഴ്‌സൽ കൈപ്പറ്റാനോ ഇരുന്ന് ഭക്ഷണം കഴിക്കാനോ അനുവദിക്കില്ല. മെഡിക്കൽ സ്റ്റോറുകൾ, പെട്രോൾ പമ്പുകൾ, പാചകവാതക വിതരണ ഏജൻസികൾ, എ.ടി.എമ്മുകൾ, ജീവൻരക്ഷാ ഉപകരണങ്ങൾ വിൽക്കുന്ന കടകൾ, ആശുപത്രികൾ, ലബോറട്ടറികൾ എന്നിവയ്ക്ക് സമയനിയന്ത്രണം ബാധകമല്ല. പാചക വാതക വിതരണത്തിനും സമയ പരിധിയില്ല.
അവശ്യസാധനങ്ങൾ ഏറ്റവും അടുത്ത കടകളിൽ നിന്ന് വാങ്ങണം.