മൊത്തം ഒരു കോടിയോളം

തൃശൂർ: കൊടകരയിൽ വാഹനാപകടം ഉണ്ടാക്കി 25 ലക്ഷവും കാറും തട്ടിയെന്ന കേസിൽ, പ്രതികൾ ഒളിപ്പിച്ച 11.96 ലക്ഷം രൂപ കൂടി അന്വേഷണ സംഘം കണ്ടെടുത്തു. ഇതോടെ മൊത്തം കണ്ടെത്തിയത് ഒരു കോടിയോളം രൂപ. മുഖ്യപ്രതി രഞ്ജിത്തിന്റെ വെള്ളാങ്ങല്ലൂർ വെളിയനാടുള്ള വീട്ടിൽ പലയിടത്തായി ഒളിപ്പിച്ച 11.96 ലക്ഷമാണ് ഇന്നലെ കണ്ടെടുത്തത്. ചോദ്യം ചെയ്യലിൽ പണം ഇല്ലെന്ന നിലപാടിൽ ഉറച്ചു നിന്ന പ്രതിയെ തെളിവുകൾ സഹിതം പൊലീസ് നടത്തിയ നീക്കത്തിലൂടെ കുടുക്കിയാണ് പണം ഇരിക്കുന്ന സ്ഥലങ്ങൾ തിരിച്ചറിഞ്ഞത്. കസ്റ്റഡിയിലെടുത്ത പ്രതികളുടെ ചോദ്യംചെയ്യൽ പൂർത്തിയായി.

ബാക്കി തുക കണ്ടെത്താനും കേസിലെ രാഷ്ട്രീയ ബന്ധം അന്വേഷിക്കാനുമുള്ള ശ്രമത്തിലാണ് പൊലീസ്. മൂന്നരക്കോടി രൂപ അപഹരിച്ചെന്ന പ്രചാരണം സത്യമാണെന്ന് വിവരം കിട്ടിയിട്ടുണ്ട്. തിരഞ്ഞെടുപ്പിന്റെ അവസാന സമയത്ത് ചെലവഴിക്കാൻ ദേശീയ പാർട്ടി കൊടുത്തുവിട്ടതാണ് 3.5 കോടിയെന്നായിരുന്നു പ്രചാരണം. ഈ പണമാണ് കവർന്നതെന്നതും ഏറക്കുറെ വ്യക്തമായി. 19 പ്രതികളെ അറസ്റ്റ് ചെയ്തു.