തൃശൂർ: കൊവിഡ് വ്യാപനത്തെ തുടർന്ന് ഒരു മാസത്തോളമായി അടഞ്ഞു കിടക്കുന്ന നഗരത്തിലെ മാർക്കറ്റുകൾ തുറക്കുന്നതിന്റെ ഭാഗമായി കൊവിഡ് പരിശോധനകളും അണു നശീകരണപ്രവർത്തനവും അരംഭിച്ചു. നാളെ മുതൽ ആണ് നിയന്ത്രണങ്ങളോടെ മാർക്കറ്റ് തുറക്കാൻ മന്ത്രിമാരുടെ സാന്നിദ്ധ്യത്തിൽ ചേർന്ന യോഗത്തിൽ തീരുമാനം ആയത്. മാർക്കറ്റുകൾ തുറക്കുന്നതിന് മുന്നോടിയായി രാവിലെ മുതൽ 500 പേർക്ക് കോവിഡ് ആന്റിജൻ ടെസ്റ്റ് ആരംഭിച്ചു .ശക്തൻ മാർക്കറ്റിൽ ആണ് ടെസ്റ്റ്.
കൃത്യമായ ഇടവേളകളിൽ കൊവിഡ് പരിശോധന നടത്താനുള്ള ക്രമീകരണം ഏർപ്പെടുത്തുമെന്നും അതത് സ്ഥാപന ഉടമകൾ ഇക്കാര്യങ്ങൾ ഉറപ്പാക്കണമെന്നും നിർദ്ദേശിച്ചിട്ടുണ്ട്. ശക്തൻ മാർക്കറ്റ്, ജയഹിന്ദ്, അരിയങ്ങാടി, നായരങ്ങാടി തുടങ്ങിയ നഗരപരിധിയിലെ മാർക്കറ്റുകൾ ആണ് തുറക്കുന്നത് . ബാങ്കുകളുടെ പ്രവർത്തന സമയം തിങ്കൾ, ബുധൻ, വെള്ളി ദിവസങ്ങളിൽ വൈകിട്ട് അഞ്ചു മണിവരെ നീട്ടിയിട്ടുണ്ട്. ജില്ലയിലെ കുറി കമ്പിനികൾക്ക് ഇതേ ദിവസങ്ങളിൽ ഉച്ചയ്ക്ക് ഒരുമണിവരെയും പ്രവർത്തിക്കാൻ അനുമതിയുണ്ടിയിരിക്കും. പുതിയ അധ്യയന വർഷം ആരംഭിക്കുന്നതിനാൽ പഠനസാമഗ്രികൾ വിൽക്കുന്ന കടകൾക്ക് ചൊവ്വ, വ്യാഴം, ശനി ദിവസങ്ങളിൽ രാവിലെ 9 മണി മുതൽ വൈകിട്ട് 5 വരെ പ്രവർത്തിക്കാം. തുണിക്കടകൾ, സർണ്ണക്കട, ചെരുപ്പ് കട എന്നിവയ്ക്ക് തിങ്കൾ, ബുധൻ, വെള്ളി ദിവസങ്ങളിൽ രാവിലെ 9 മുതൽ വൈകിട്ട് 5 വരെയും പ്രവർത്തിക്കാം.

മൊത്ത കച്ചവടർക്കാർക്ക് വിൽപ്പന 8 വരെ
മാർക്കറ്റുകളിൽ മൊത്ത വിൽപന സ്ഥാപനങ്ങൾക്ക് രാത്രി ഒരു മണി മുതൽ രാവിലെ എട്ട് മണിവരെയും ചില്ലറ വ്യാപാര സ്ഥാപനങ്ങൾക്ക് രാവിലെ 8.30 മുതൽ ഉച്ചയ്ക്ക് 12 മണിവരെയുമാണ് പ്രവർത്തിക്കാൻ അനുമതി.അന്യ സംസ്ഥാനങ്ങളിൽ നിന്ന് രാത്രികാലങ്ങളിൽ മാർക്കറ്റുകളിൽ എത്തുന്ന വാഹനങ്ങൾ വാഹനങ്ങളിലെ െ്രെഡവർമാർ, ചുമടെടുക്കാൻ എത്തുന്ന തൊഴിലാളികൾ എന്നിവർ കൊവിഡ് മാനദണ്ഡ പ്രകാരം സ്വയം സാനിറ്റൈസ് ചെയ്യുന്നതിനും വാഹനങ്ങൾ അണുവിമുക്തമാക്കുന്നതിനും കരുതൽ സ്വീകരിക്കണം. സ്ഥാപനങ്ങളിലെ ജീവനക്കാരുടെ എണ്ണത്തിലും ജില്ലാ ഭരണകൂടം ഏർപ്പെടുത്തിയിട്ടുള്ള നിർദ്ദേശങ്ങൾ പാലിക്കണം. സാധാരണ ചെറിയ കടകളിൽ രണ്ടുപേരും വലിയ സ്ഥാപനങ്ങളിൽ ഉടമസ്ഥൻ അടക്കം മൂന്നുപേരും മാത്രമാണ് ഉണ്ടാകാൻ പാടുള്ളൂ. പുറമേ നിന്ന് സാധനങ്ങൾ വാങ്ങാൻ എത്തുന്നവരുടെ തിരക്ക് നിയന്ത്രിക്കാൻ പൊലീസ് പ്രത്യേക സംവിധാനം ഒരുക്കും.

മത്സ്യ മാർക്കറ്റ് മൂന്നു ദിവസം
മത്സ്യ, മാംസ മാർക്കറ്റുകൾക്ക് ആഴ്ചയിൽ മൂന്ന് ദിവസം മാത്രമാണ് പ്രവർത്തിക്കാൻ അനുമതി. തിങ്കൾ, ബുധൻ, ശനി ദിവസങ്ങളിൽ മത്സ്യ, മാംസ മാർക്കറ്റുകൾക്ക് രാവിലെ ഏഴു മുതൽ വൈകിട്ട് അഞ്ചു മണിവരെ പ്രവർത്തിക്കാം. മുമ്പ് കണ്ടെയിൻമെന്റ് സോണുകളിൽ ബുധൻ, ശനി ദിവസങ്ങളിൽ തുറന്നിരുന്ന മത്സ്യ, മാംസ വ്യാപാര സ്ഥാനങ്ങൾക്ക് തിങ്കളാഴ്ചകൂടി ഇതേ സമയക്രമത്തിൽ തുറന്ന് പ്രവർത്തിക്കാനും അനുമതിയുണ്ട്. മാർക്കറ്റുകളുടെ പ്രവർത്തനം ആരംഭിച്ചാലും വഴിയോര കച്ചവടങ്ങൾക്ക് അനുമതി ഉണ്ടിയിരിക്കുന്നതല്ല. .