ഇരിങ്ങാലക്കുട : സ്വച്ഛമായ പ്രകൃതിക്ക് മേലെ അധിനിവേശ സാദ്ധ്യതകൾ തുറന്നിട്ട് ഭൂപരിവർത്തനത്തിനും വാണിജ്യവത്കരണത്തിനുമുള്ള നീക്കങ്ങളാണ് ലക്ഷദ്വീപിൽ നടക്കുന്നതെന്ന് മന്ത്രി ആർ. ബിന്ദു അഭിപ്രായപ്പെട്ടു.
ബഹുരാഷ്ട്ര കുത്തകകൾക്ക് ദ്വീപ് സമൂഹത്തെ അടിയറ വയ്ക്കാനുള്ള ശ്രമമാണ് ഇതിന്റെ പിന്നിലെന്നും മന്ത്രി പറഞ്ഞു. പുരോഗമന കലാസാഹിത്യ സംഘം ഇരിങ്ങാലക്കുട മേഖലാ കമ്മിറ്റിയുടെ ആഭിമുഖ്യത്തിൽ ജൂൺ 15 വരെ ഓൺലൈനായി നടക്കുന്ന ലക്ഷദ്വീപ് സർഗ്ഗ പ്രതിഷേധ പരിപാടിയുടെ ആദ്യ പോസ്റ്റിട്ട് ഉദ്ഘാടനം ചെയ്യുകയായിരുന്നു മന്ത്രി. ഖാദർ പട്ടേപ്പാടം അദ്ധ്യക്ഷത വഹിച്ചു. ഡോ.കെ. രാജേന്ദ്രൻ ആമുഖ പ്രഭാഷണം നടത്തി. പ്രൊഫ.കെ. സച്ചിദാനന്ദൻ, വൈശാഖൻ, അശോകൻ ചരുവിൽ, ഖദീജ മുംതാസ്, പി.പി രാമചന്ദ്രൻ, രേണു രാമനാഥൻ എന്നിവർ സംസാരിച്ചു.