തിരുവനന്തപുരം: തൈക്കാട് ശാന്തികവാടത്തിന്റെ നവീകരണവുമായി ബന്ധപ്പെട്ട ഫേസ്ബുക്ക് പോസ്റ്റ് വിവാദത്തിൽ മേയർ ആര്യാ രാജേന്ദ്രനെ പിന്തുണച്ച് നടൻ ഹരീഷ് പേരടി. കൊവിഡ് വ്യാപനം രൂക്ഷമാകുന്ന പശ്ചാത്തലത്തിൽ ശാന്തികവാടത്തിൽ പൂർത്തീകരിച്ച ഗ്യാസ് ശ്‌മശാനം പ്രവർത്തനം ആരംഭിച്ചെന്ന മേയറുടെ പോസ്റ്റ് വിവാദമായിരുന്നു. തുടർന്നാണ് പിന്തുണ പ്രഖ്യാപിച്ച് ഹരീഷ് പേരടി ഫേസ്ബുക്കിൽ പോസ്റ്റിട്ടത്. ' നല്ല റോഡുണ്ടാക്കി എന്നതിനെക്കാൾ അപ്പുറമാണ് അന്തസായി കിടക്കാൻ ശ്‌മശാനമുണ്ടെന്ന് പറയുന്നതും '​ ആര്യാ... നിങ്ങളാണ് ശരിയെന്നും അദ്ദേഹം കുറിച്ചു.

ഫേസ്ബുക്ക് പോസ്റ്റിന്റെ പൂർണരൂപം: '' നല്ല റോഡുണ്ടാക്കി, നല്ല പാലമുണ്ടാക്കി, നല്ല സ്‌കൂളുണ്ടാക്കി, നല്ല ആശുപത്രിയുണ്ടാക്കി, റേഷൻ ഷോപ്പിൽ നല്ല ഭക്ഷ്യപദാർത്ഥങ്ങളുണ്ട്, കുടുംബശ്രീ ഹോട്ടലുകളിൽ നല്ല ഭക്ഷണമുണ്ട്..എന്ന് പറയുന്നതുപോലെ തന്നെയാണ്,​ അല്ലെങ്കിൽ അതിനെക്കാൾ അപ്പുറമാണ് മരിച്ചുകഴിഞ്ഞാൽ ഇവിടെ അന്തസായി കിടക്കാൻ ഒരു പൊതുശ്‌മശാനമുണ്ടെന്ന് പറയുന്നതും. അല്ലെങ്കിൽ ഈ മഹാമാരിക്കാലത്ത് ഉത്തരേന്ത്യയിലെ തെരുവുകളിൽ ശവങ്ങൾ ഊഴം കാത്തുകിടക്കുന്നതുപോലെ കിടക്കേണ്ടി വരും. സ്വന്തക്കാരുടെ ശവങ്ങൾ സൈക്കളിൽ ഉന്തിത്തളർന്ന് വഴിയരികിൽ ഹൃദയം തകർന്ന് ഇരിക്കേണ്ടിവരും. പ്രിയപ്പെട്ട അനിയത്തി, ആര്യാ നിങ്ങളാണ് ശരി. ആധുനിക കേരളത്തിന് നിങ്ങളിൽ പ്രതീക്ഷയുണ്ട്. നൂറുവട്ടം സഖാവ് ആര്യയോടൊപ്പം''.