രോഗവ്യാപനവും ചികിത്സയിലുള്ളവരും കുറയുന്നു

മരണം വീണ്ടും നൂറുകടന്നു

തിരുവനന്തപുരം : സംസ്ഥാനത്ത് തുടർച്ചയായ മൂന്നാംദിവസവും കൊവിഡ് രോഗവ്യാപന നിരക്കിലും ചികിത്സയിലുള്ളവരുടെ എണ്ണത്തിലും ക്രമാനുഗതമായ കുറവ്. ഇന്നലെ 30,491 പേർക്കാണ് രോഗം സ്ഥിരീകരിച്ചത്. ടെസ്റ്റ് പോസിറ്റിവിറ്റി നിരക്ക് 23.18 ശതമാനം.

24 മണിക്കൂറിനിടെ 1,31,525 സാമ്പിളുകളാണ് പരിശോധിച്ചത്. ഇതോടെ 3,17,850 പേരാണ് ചികിത്സയിലുള്ളത്. അതേസമയം തുടർച്ചയായ രണ്ടാംദിവസവും മരണം നൂറുകടന്നു. 128 മരണങ്ങളാണ് ഇന്നലെ സ്ഥിരീകരിച്ചത്. 101 ആരോഗ്യ പ്രവർത്തകരും രോഗബാധിതരായി. ഇന്നലെ രോഗം സ്ഥിരീകരിച്ചവരിൽ 28,176 പേർക്ക് സമ്പർക്കത്തിലൂടെയാണ് രോഗം ബാധിച്ചത്. 2042 പേരുടെ ഉറവിടം വ്യക്തമല്ല. 172 പേർ സംസ്ഥാനത്തിന് പുറത്ത് നിന്നു വന്നവരാണ്. ചികിത്സയിലായിരുന്ന 44,369 പേർ രോഗമുക്തി നേടി.

രോഗവ്യാപനത്തിൽ ഇന്നലെയും മലപ്പുറമാണ് മുന്നിൽ. ജില്ലയിൽ ഇന്നലെ 4746 കേസുകളാണ് റിപ്പോർട്ട് ചെയ്തത്. തിരുവനന്തപുരം 3969, എറണാകുളം 3336, കൊല്ലം 2639, പാലക്കാട് 2560, ആലപ്പുഴ 2462, തൃശൂർ 2231, കോഴിക്കോട് 2207, കോട്ടയം 1826, കണ്ണൂർ 1433, പത്തനംതിട്ട 991, ഇടുക്കി 846, കാസർകോട് 728, വയനാട് 517 എന്നിങ്ങനെയാണ് ജില്ലകളിലെ സ്ഥിതി.