തിരുവനന്തപുരം: ബംഗാൾ ഉൾക്കടലിൽ ഇന്ന് രൂപം കൊള്ളുന്ന പുതിയ ന്യൂനമർദ്ദത്തെ തുടർന്ന് സംസ്ഥാനത്ത് വേനൽ മഴ വീണ്ടും ശക്തമാകുമെന്ന് കാലാവസ്ഥാകേന്ദ്രത്തിന്റെ മുന്നറിയിപ്പ്. രണ്ടുദിവസത്തിനുള്ളിൽ ന്യൂനമർദ്ദം ശക്തിപ്പെട്ട് വടക്കോട്ട് നീങ്ങും. ചൊവ്വാഴ്ചയോ, ബുധനാഴ്ചയോ അത് ഒഡിഷയിൽ വീശിയടിക്കും. ഇതേത്തുടർന്ന് വരുന്ന ദിവസങ്ങളിൽ സംസ്ഥാനത്ത് ശക്തമായ കാറ്റിനും മഴയ്ക്കും സാദ്ധ്യതയുണ്ട്. തെക്കൻ ജില്ലകളിൽ ചൊവ്വാഴ്ച വരെ യെല്ലോ അലർട്ട് പുറപ്പെടുവിച്ചിട്ടുണ്ട്.

ആൻഡമാനിനടുത്താണ് ന്യൂനമർദ്ദം ഇപ്പോഴുള്ളത്. തെക്കുപടിഞ്ഞാറൻ കാലവർഷം സംസ്ഥാനത്ത് നേരത്തെ എത്താനാണ് സാദ്ധ്യത. അടുത്തയാഴ്ച ആൻഡമാനിലെത്തുന്ന കാലവർഷം ദിവസങ്ങൾക്കുള്ളിൽ ഇന്ത്യൻ തീരത്തെത്തും. ആദ്യം കേരളത്തിലെത്തുന്ന മഴക്കാലം പിന്നീട് മറ്റ് സംസ്ഥാനങ്ങളിലേക്ക് വ്യാപിക്കും.