കൊവിഡ് മഹാമാരിയെ നമുക്ക് ചുറ്റും നിന്ന് തുടച്ചുനീക്കണമെങ്കിൽ എല്ലാവരിലേക്കും വാക്സിനേഷനെത്തണം. എന്നാൽ, വാക്സിനെടുക്കാൻ മടിക്കുന്നവർ ഏറെയാണ്. അത്തരക്കാർക്കായി ഒരു പുത്തൻ ഓഫർ മുന്നോട്ട് വച്ചിരിക്കുകയാണ് തായ്ലൻഡിലെ ഒരു നഗരം. ഓരോ ആഴ്ചയും നറുക്കെടുപ്പിലൂടെ തിരഞ്ഞെടുക്കപ്പെടുന്ന ഒരാൾക്ക് പശുക്കുട്ടിയെ സമ്മാനമായി ലഭിക്കും.
ഈ വർഷം അവസാനം വരെ ഈ കാമ്പെയ്ൻ തുടരും. വടക്കൻ തായ്ലൻഡിലെ ചിയാംഗ് മേയ് പ്രവിശ്യയിലെ മേ ചേം ജില്ലയിൽ അടുത്ത മാസം മുതലാണ് കാമ്പെയ്ൻ ആരംഭിക്കുന്നത്. വാക്സിൻ സ്വീകരിച്ചവരിൽ നിന്ന് എല്ലാ ആഴ്ചയിലും തിരഞ്ഞെടുക്കപ്പെടുന്ന ഒരാൾക്കാണ് 10,000 തായ് ബാട്ട് ( ഏകദേശം 23,000 ) രൂപ വിലവരുന്ന പശുക്കുട്ടിയെ നൽകുന്നത്. 24 ആഴ്ച കാമ്പെയ്ൻ തുടരാനാണ് പദ്ധതി. 43,000 പേരാണ് ഈ നഗരത്തിൽ താമസിക്കുന്നത്. പദ്ധതി പ്രഖ്യാപിച്ച് ദിവസങ്ങൾക്കുള്ളിൽ വാക്സിൻ സ്വീകരിച്ചവരുടെ എണ്ണം കുതിച്ചുയർന്നതായി അധികൃതർ പറയുന്നു.
പ്രദേശവാസികൾക്കിടെയിൽ കാലി വളർത്തലിന് പ്രചാരം കൂടുതലാണ്. 4,000 പേർ ഇതിനോടകം വാക്സിനേഷനായി രജിസ്റ്റർ ചെയ്ത് കഴിഞ്ഞു. ജൂൺ ഏഴ് മുതലാണ് മേ ചേം വാക്സിൻ വിതരണം ആരംഭിക്കുന്നത്. വാക്സിൻ സ്വീകരിക്കാൻ മടിയ്ക്കുന്നവരെ ആകർഷിക്കാൻ മറ്റ് പല പദ്ധതികളും തായ്ലൻഡിലെ വിവിധ പ്രവിശ്യകൾ ആസൂത്രണം ചെയ്യുന്നുണ്ട്. കടകളിൽ ഡിസ്കൗണ്ട് കൂപ്പൺ ഓഫർ മുതൽ സ്വർണ നെക്‌ലേസ് സമ്മാനം വരെയാണ് വാക്സിനേഷനെ പ്രോത്സഹാപ്പിക്കാൻ പ്രവിശ്യാ ഭരണകൂടങ്ങൾ ആലോചിക്കുന്നത്.
66 മില്യൺ ജനസംഖ്യയുള്ള തായ്‌ലൻഡിൽ 1.64 പേരാണ് ഇതുവരെ വാക്സിന്റെ ആദ്യ ഡോസ് സ്വീകരിച്ചത്. 70 ലക്ഷത്തോളം പേർ വാക്സിനായി രജിസ്റ്റർ ചെയ്തു കഴിഞ്ഞു. 126,200 ലേറെ പേർക്കാണ് തായ്‌ലൻഡിൽ ഇതുവരെ കൊവിഡ് സ്ഥിരീകരിച്ചത്. രാജ്യത്ത് 760 ലേറെ പേർ കൊവിഡ് ബാധിച്ച് മരിച്ചതായാണ് ഔദ്യോഗിക കണക്കുകൾ.