ആറ്റിങ്ങൽ: ആറ്റിങ്ങലിൽ ബിവറേജസ് ഗോഡൗണിൽ നിന്ന് മദ്യം മോഷണംപോയ സംഭവത്തിൽ പ്രതികളെ തിരിച്ചറിഞ്ഞിട്ടുണ്ടെന്നും ഉടൻ പിടികൂടുമെന്നും എക്‌സൈസ് വിജിലൻസ് ഓഫീസർ മുഹമ്മദ്‌ ഷാഫി പറഞ്ഞു. മോഷണം നടന്ന ബിവറേജസ് ഗോഡൗണിലും പരിസരപ്രദേശത്തും വിജിലൻസ് ഓഫീസർ,​ അസിസ്റ്റന്റ് കമ്മിഷണർ സുനു എന്നിവർ പരിശോധന നടത്തി. നിലവിൽ 130 കെയ്സ് മദ്യം മോഷണം പോയതായാണ് കണക്കാക്കുന്നത്. ഗോഡൗണിലെ സ്റ്റോക്ക് പരിശോധന പൂർത്തിയായാൽ മാത്രമേ നഷ്ടത്തിന്റെ യഥാർത്ഥ കണക്ക് വ്യക്തമാവുകയുള്ളൂവെന്ന് അധികൃതർ അറിയിച്ചു. ഏപ്രിൽ 27ന് ശേഷം ഗോഡൗൺ പ്രവർത്തിച്ചിട്ടില്ല. മേയ് 8ന് ശേഷമുള്ള ആറ് ദിവസങ്ങളിലായാണ് മദ്യം കടത്തിയതെന്ന് സി.സി ടിവി ദൃശ്യങ്ങളിൽ നിന്ന് വ്യക്തമാണ്. കെട്ടിടത്തിന്റെ സുരക്ഷാക്രമീകരണങ്ങൾ ഉയർത്താനുള്ള നടപടികൾ സ്വീകരിക്കുമെന്ന് മാനേജർ പറഞ്ഞു.