തിരുവനന്തപുരം: പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിക്കാൻ ശ്രമിച്ച കേസിലെ പ്രതിയെ പിടികൂടി. പുനലൂർ തിങ്കൾകരിക്കകം മാർത്താണ്ഡംകര ഏഴംകുളം അദ്വൈതം വീട്ടിൽ ബിജുവിനെയാണ് (46) കഴക്കൂട്ടം പൊലീസ് അറസ്റ്റ് ചെയ്‌തത്. കഴിഞ്ഞ ഡിസംബർ 21നാണ് പെൺകുട്ടിക്ക് നേരെ അതിക്രമം നടന്നതെങ്കിലും ഇത് സംബന്ധിച്ച് പരാതി ലഭിച്ചിരുന്നില്ല. എന്നാൽ ചൈൽഡ് ലൈൻ പ്രവർത്തകർ ഇടപെട്ട് അടുത്തിടെയാണ് പൊലീസിൽ പരാതി നൽകിയത്. തുടർന്ന് പോക്‌സോ നിയമപ്രകാരം കേസ് രജിസ്റ്റർ ചെയ്ത് നടത്തിയ അന്വേഷണത്തിലാണ് പ്രതി പിടിയിലായത്. കഴക്കൂട്ടം എസ്.എച്ച്.ഒ ബിജുവിന്റെ നേതൃത്വത്തിൽ എസ്.ഐ വിപിൻകുമാർ, എസ്.സി.പി.ഒ ബൈജു, സി.പി.ഒമാരായ സജാദ്, അൻസിൽ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. പ്രതിയെ റിമാൻഡ് ചെയ്‌തു.