അജാനൂർ: അജാനൂർ ഗ്രാമ പഞ്ചായത്ത് കൊവിഡ് പ്രതിരോധ പ്രവർത്തനം ശക്തമാക്കുന്നതിന്റെ ഭാഗമായുള്ള 'പുഞ്ചിരി ' സിറോ ടി.പി.ആർ കർമ്മ പദ്ധതിയുടെ ഭാഗമായി തീരദേശ മേഖലയിൽ പ്രത്യേക പദ്ധതി നടപ്പാക്കി. തീരദേശ വാർഡുകളിലെ മുഴുവൻ മത്സ്യ തൊഴിലാളികൾക്കും ഹോമിയോ പ്രതിരോധ മരുന്ന് വിതരണം ചെയ്തു. കൊവിഡ് രോഗികളുടേയും മറ്റ് രോഗമുള്ളവരുടെയും ശരീരത്തിലെ ഓക്സിജന്റെ അളവ് പരിശോധിക്കുന്നതിന് വേണ്ടി പൾസ് ഓക്സി മിറ്ററുകളും വിതരണം ചെയ്തു. ജാഗ്രതാ വോളണ്ടിയേഴ്സിന് ആവശ്യമായ മാസ്‌ക്ക് ഗ്ലൗസ് എന്നിവയും നൽകി. രോഗികളെ ആശുപതികിലേക്കും കൊവിഡ് ടെസ്റ്റിനും കൊണ്ടുപോകുന്നതിന്ന് വാഹന സൗകര്യവും ഒരുക്കിയിട്ടുണ്ട്. കൂടാതെ വീടുകളിൽ അണുനശീകരണവും നടത്തി. തീരദേശ വാർഡുകളിൽ പൾസ് ഓക്സി മീറ്ററുകളുടേയും പ്രതിരോധ മരുന്നിന്റേയും വിതരണം പഞ്ചായത്ത് പ്രസിഡന്റ് ടി. ശോഭ നിർവഹിച്ചു. വിവിധ വാർഡുകളിലായി പഞ്ചായത്ത് വൈസ് പ്രസിഡന്റ് കെ. സബീഷ്, സ്റ്റാൻഡിംഗ് കമ്മിറ്റി ചെയർമാൻമാരായ കെ. മീന, കെ. കൃഷ്ണൻ, ഷീബ ഉമ്മർ, പഞ്ചായത്ത് അംഗങ്ങളായ എം. ബാലകൃഷ്ണൻ, സി. കുഞ്ഞാമിന, അശോകൻ ഇട്ടമ്മൽ, രവീന്ദ്രൻ, ഇബ്രാഹിം ആവിക്കൽ, കെ. സതി, ഹംസ എന്നിവരും ജീവനക്കാരായ ജിതേഷ്, നജുമുദ്ദീൻ എന്നിവരും പങ്കെടുത്തു.