കാസർകോട്: സെൻട്രൽ വെയർഹൗസിംഗ് കോർപ്പറേഷന് ഗോഡൗൺ നിർമ്മിക്കാൻ അമ്പലത്തുകര വില്ലേജിലെ കാഞ്ഞിരപൊയിലിൽ മൂന്ന് ഏക്കർ സർക്കാർ ഭൂമി 30 വർഷത്തേക്ക് പാട്ടത്തിന് അനുവദിച്ചു. കാസർകോട് കളക്ടറേറ്റ് മിനി കോൺഫറൻസ് ഹാളിൽ ഇ. ചന്ദ്രശേഖരൻ എം.എൽ.എയുടെ അദ്ധ്യക്ഷതയിൽ നടന്ന ചടങ്ങിൽ ജില്ലാ കളക്ടർ ഡോ. ഡി. സജിത് ബാബു സെൻട്രൽ വെയർഹൗസിംഗ് കോർപ്പറേഷൻ റീജിയണൽ മാനേജർ പി. രാധാകൃഷ്ണൻ നായർക്ക് ഭൂമിയുടെ രേഖകൾ കൈമാറി. ജില്ലാ പഞ്ചായത്ത് പ്രസിഡന്റ് പി. ബേബി ബാലകൃഷ്ണൻ, സെൻട്രൽ വെയർഹൗസിംഗ് കോർപ്പറേഷൻ എക്സിക്യുട്ടീവ് എൻജിനീയർ സി.എ. ജോൺസൻ, ഡി. ഉദയഭാനു, മാനേജർ ദീപക് വർമ്മ എന്നിവർ സംബന്ധിച്ചു.

ജില്ലയിലെ ആദ്യത്തെ സെൻട്രൽ വെയർഹൗസിംഗ് ഗോഡൗൺ 10,000 മെട്രിക് ടൺ സംഭരണ ശേഷിയുള്ളതാണ്. വെയർഹൗസ് 60,000 ചതുരശ്ര അടി വിസ്തൃതിയിലാണ് നിർമ്മിക്കുന്നത്. ഒരു വർഷത്തിനകം നിർമ്മാണം പൂർത്തിയാക്കും.12 കോടി രൂപ മുതൽ മുടക്ക് പ്രതീക്ഷിക്കുന്നുവെന്ന് റീജിയണൽ മാനേജർ അറിയിച്ചു. വാഹന ഭാര പരിശോധന സംവിധാനവും ഉണ്ടാകും. സർക്കാർ, സ്വകാര്യ മേഖലകളിലെ സ്ഥാപനങ്ങൾക്കും വ്യക്തികൾക്കും സംഭരണ സൗകര്യം വാടകയ്ക്ക് അനുവദിക്കും. നിലവിൽ സംസ്ഥാനത്ത് 13 സി.ഡബ്ല്യു സി ഗോഡൗണുകളിലായി 1,80,000 മെട്രിക് ടൺ സംഭരണശേഷിയാണുള്ളത്. ഇത് രണ്ടര ലക്ഷം മെട്രിക് ടണ്ണായി ഉയർത്തുന്നതിനാണ് കോർപ്പറേഷൻ ലക്ഷ്യമിടുന്നത്.