സഞ്ചാരികളുടെ പ്രിയപ്പെട്ട സ്ഥലങ്ങളിൽ ഒന്നാണ് മാലി ദ്വീപ്. അതിമനോഹരമായ ജലാശയങ്ങളും റിസോർട്ടുകളും നിറഞ്ഞ ഇവിടേക്ക് ആയിരക്കണക്കിന് പേരാണ് ഒഴുകിയെത്തുന്നത്. ഒട്ടനവധി കാഴ്ചകളുള്ള മാലിയിൽ ഏവരെയും അത്ഭുതപ്പെടുത്തുന്ന ഒന്നാണ് നീല നിറത്തിൽ തിളങ്ങുന്ന ഒരു ബീച്ച്. മാലിയിലെ ചെറുദ്വീപായ വാദ്ധൂവിലെ ഈ ബീച്ച് രാത്രിയിലാണ് നീല നിറത്തിൽ തിളങ്ങുന്നത് !

കണ്ടാൽ ശരിക്കും ആയിരക്കണക്കിന് എൽ.ഇ.ഡി ബൾബുകൾ കത്തിനിൽക്കുന്നത് പോലെയാണ്. അജ്ഞാത ശക്തികളാണ് ബീച്ചിലെ ഈ അസാമാന്യ തിളക്കത്തിന് പിന്നിലെന്നായിരുന്നു പണ്ട് അവിടുള്ളവർ വിശ്വസിച്ചിരുന്നത്. ബീച്ചിന്റെ ചിത്രങ്ങൾ കണ്ട പലരും ഇത് വ്യാജമാണെന്ന് വരെ വാദിച്ചിരുന്നു.

എന്നാൽ, തിളങ്ങുന്ന ബീച്ചിന് പിന്നിലെ യഥാർത്ഥ രഹസ്യം എന്താണെന്നറിയാമോ. കുറച്ച് കുഞ്ഞൻ ജീവികളാണ് അതിന് പിന്നിൽ. ' ലിൻഗുലൊഡിനിയം പോളിഡ്ര " എന്ന ഈ ചെറു ജീവികളാണ് ഇരുണ്ട ആകാശത്ത് നക്ഷത്രങ്ങൾ തിളങ്ങുന്ന പോലെയുള്ള ഈ കാഴ്‌ച സൃഷ്‌ടിക്കുന്നത്. ഏകദേശം ഒരു മില്ലിമീറ്റർ മാത്രം വലിപ്പമേ ഉള്ളൂ ഈ ഇത്തിരി കുഞ്ഞൻമാർക്ക്.

മിന്നാമിനുങ്ങിലും മറ്റും കാണപ്പെടുന്ന 'ബയോലൂമിനസെൻസ് ' അഥവാ ' ജൈവദീപ്‌തി ' എന്ന പ്രത്യേകതയാണ് ഇവരിൽ നിന്നും പ്രകാശം ഉണ്ടാകാനുള്ള കാരണം. ഒരു മിനിട്ടോളം ഇവരുടെ പ്രകാശം നീണ്ടു നിൽക്കും. ഇക്കൂട്ടർ കൂട്ടമായി കടൽത്തീരത്ത് എത്തുമ്പോഴാണ് രാത്രിയിൽ തിരകൾക്കിടെയിൽ തിളങ്ങുന്ന നീല നിറം പ്രത്യക്ഷപ്പെടുന്നത്. ജൂലായ് മുതൽ ഫെബ്രുവരി വരെയുള്ള കാലയളവിലാണ് ഈ ദൃശ്യം പലപ്പോഴും പ്രകടമാകുന്നത്. വാദ്ധൂവിനെ കൂടാതെ മാലിയുടെ മറ്റ് ഭാഗങ്ങളിലെ ബീച്ചിലും ഈ പ്രതിഭാസം പ്രകടമാകാറുണ്ട്. മാലിയിൽ മാത്രമല്ല, സതേൺ കാലിഫോണിയ, ജപ്പാൻ, വിയറ്റ്നാം തുടങ്ങി ലോകത്തിന്റെ വിവിധ ഭാഗങ്ങളിൽ ഇത്തരത്തിൽ തിളങ്ങുന്ന ബീച്ചുകൾ കാണാനാകും.