ചേർത്തല: വിദ്യാർത്ഥികൾക്ക് പാഠങ്ങൾ ഓൺലൈനായി പകർന്നു നൽകുന്നതിന് കാവുങ്കൽ എന്റെ ഗ്രാമം കൂട്ടായ്മയുടെ 'അക്ഷരമിത്രം' പഠന സഹായ പദ്ധതിക്ക് തുടക്കമായി. പഠന പ്രോത്സാഹനമായി ഒരു വർഷത്തേക്കുള്ള ഇന്റർനെ​റ്റ് മൊബൈൽ ഡാ​റ്റയാണ് കൂട്ടായ്മ കുട്ടികൾക്കായി നൽകുന്നത്.

കാവുങ്കൽ ഗ്രാമാതിർത്തിയിൽ സാമ്പത്തികമായി പിന്നാക്കം നിൽക്കുന്ന കുടുംബങ്ങളിലെ ഒന്നു മുതൽ ബിരുദാനന്തര തലം വരെയും സാങ്കേതിക വിദ്യാഭ്യാസം ചെയ്യുന്നവരുമുൾപ്പെടുന്ന 30 ഓളം വിദ്യാർത്ഥികൾക്കാണ് പഠന സഹായമായി 2021-22 അദ്ധ്യയന വർഷം മുഴുവൻ മൊബൈൽ ഡാ​റ്റ എത്തിക്കുന്നത്. മണ്ണഞ്ചേരി ഗ്രാമപഞ്ചായത്ത് ഓഫീസിൽ നടന്ന ചടങ്ങ് പഞ്ചായത്ത് പ്രസിഡന്റ് ടി.വി.അജിത് കുമാർ മൊബൈൽ ഡാ​റ്റ ചാർജ്ജ് ചെയ്ത് ഉദ്ഘാടനം നിർവഹിച്ചു. കൂട്ടായ്മയുടെ ചെയർമാർ പി.എസ്.സന്തോഷ് കുമാർ, രക്ഷാധികാരി ടി.സജി തകിടിയിൽ, ഗ്രൂപ്പ് അഡ്മിനും ചീഫ് കോ-ഓർഡിനേ​റ്ററുമായ എം.എസ്.ജോഷി, എസ്.സുരേഷ് തറയിൽ എന്നിവർ പങ്കെടുത്തു.