ചാരുംമൂട്: ഡി.വൈ.എഫ്.ഐ പാലമേൽ തെക്ക് പാലമുക്ക് യൂണിറ്റിന്റെ നേതൃത്വത്തിൽ മുകളുവിള വാർഡിലെ കൊച്ചു കൂട്ടുകാർക്കായി 'കൂട്ടുകാർക്കൊരു കളിപ്പാട്ടം'' പരിപാടി സംഘടിപ്പിച്ചു.
4 വയസു മുതൽ 4ാം ക്ലാസ് വരെയുള്ള നൂറിലധികം കുട്ടികൾക്ക് ഡ്രോയിംഗ് കിറ്റും ഡയറിയുമാണ് സമ്മാനിച്ചത്. കൊവിഡ് കാലത്തെ ഓൺലൈൻ പഠനത്തോടൊപ്പം കുട്ടികളുടെ ബൗദ്ധികവും കലാപരവുമായ കഴിവുകളെ കണ്ടെത്തി വളർത്തിയെടുക്കുക എന്നതാണ് പരിപാടിയിലൂടെ ലക്ഷ്യമിടുന്നത്.

കൂടാതെ കഥകളും കവിതകളും ചിത്രങ്ങളും മാത്രമല്ല കുട്ടികളുടെ ഇഷ്ടങ്ങളും സന്തോഷങ്ങളും വിഷമങ്ങളും ഒക്കെ രേഖപ്പെടുത്തി അറിയിക്കുവാൻ കൂടിയാണ് 'എന്റെ ഡയറി. 30 ദിവസങ്ങൾക്കു ശേഷം ഇവ തിരിച്ചു വാങ്ങി​ വിലയിരുത്തി​ ഏറ്റവും നന്നായി ഇത് പ്രയോജനപ്പെടുത്തിയ കൂട്ടുകാർക്ക് സമ്മാനവും നൽകുമെന്ന് യൂണിറ്റ് ഭാരവാഹികൾ അറിയിച്ചു. പാലമേൽ ഗ്രാമ പഞ്ചായത്ത് പ്രസിഡന്റ് ബി.വിനോദ് നാലു വയസുകാരൻ ആർ.എസ്. ബോധിക്ക് ഡ്രോയിംഗ് കിറ്റ് നൽകി ഉദ്ഘാടനം ചെയ്തു. ബ്ലോക്ക് പഞ്ചായത്തംഗം കെ. സുമ, വാർഡ് മെമ്പർ അക്ഷിതാ രാജൻ, ഡി.വൈ.എഫ്.ഐ പാലമേൽ തെക്ക് മേഖലാ സെക്രട്ടറി ശ്രീരാജ്, സുജിത്ത്, ബിനു എന്നിവർ പങ്കെടുത്തു.