കൊവിഡ് പോസിറ്റിവായ ഒരാൾ ആശുപത്രിയിൽ

കൊച്ചി: ലക്ഷദ്വീപിൽ കളക്ടറുടെ കോലം കത്തിച്ച് പ്രതിഷേധിച്ച 24 പേർക്ക് ജാമ്യം ലഭിച്ചു. കൊവിഡ് പൊസിറ്റീവായ കെ.പി. മുഹമ്മദ് റാഫി ഒഴികെ 23 പേരും വീടുകളിലേക്ക് മടങ്ങി. മുഹമ്മദ് റാഫി കിൽത്താൻ പ്രൈമറി ഹെൽത്ത് സെന്ററിൽ ചികിത്സയിലാണ്.

ഇന്നലെ ഹൈക്കോടതി ഉത്തരവിനെ തുടർന്ന് അമിനി സി.ജെ.എം കോടതിയാണ് ജാമ്യം അനുവദിച്ചത്. ജാമ്യം ലഭിക്കാവുന്ന വകുപ്പുകളായിട്ടും റിമാൻഡ് ചെയ്തെന്ന സയ്യിദ് മുഹമ്മദ് കോയയുടെ ഹർജിയിലായിരുന്നു ഹൈക്കോടതി ഉത്തരവ്. എന്നാൽ പ്രതിഷേധക്കാർക്ക് ജാമ്യം നൽകാൻ തങ്ങൾ തയ്യാറായിരുന്നെങ്കിലും അവർ നിരസിച്ചെന്ന് കിൽത്താൻ പൊലീസ് പറയുന്നു. കസ്റ്റഡിയിൽ നിരാഹാര സമരം നടത്തിയവരുടെ വീഡിയോ സമൂഹ മാദ്ധ്യമങ്ങളിൽ പ്രചരിപ്പിച്ചതായും പൊലീസ് പറഞ്ഞു. പിന്നീട് ഇവരെ കിൽത്താൻ മജിസ്ട്രേട്ട് കോടതി ഏഴ് ദിവസത്തേക്ക് റിമാൻഡ് ചെയ്യുകയായിരുന്നു.

കളക്ടറുടെ കോലം കത്തിച്ച സംഭവത്തിൽ മേയ് 28ന് 12 യൂത്ത് കോൺഗ്രസ് പ്രവർത്തകരെ ആദ്യം അറസ്റ്റ് ചെയ്തു. 29 ന് ഉച്ചയോടെ 11 പേരെയും വൈകിട്ട് ഒരാളെയും കസ്റ്റഡിയിലെടുക്കുകയായിരുന്നു.