മാമലക്കണ്ടം: അപ്രോച്ച് റോഡിന്റെ ഒരുഭാഗം തകർന്ന് മാമലക്കണ്ടം- ഉരുളൻതണ്ണി- കുട്ടമ്പുഴ റോഡിലെ കൂട്ടിക്കുളം പാലം അപകടാവസ്ഥയിലായി. ഇളംപ്ളാശേരി, മേട്നാപ്പാറ, ഞണ്ടുകുളം, കോട്ടക്കുന്ന് തുടങ്ങിയ ആദിവാസി കോളനികളിലെ 400 കുടുംബങ്ങൾ ഉൾപ്പടെ വനമേഖലയോട് ചേർന്ന മലയോരഗ്രാമങ്ങളിലെ ആയിരത്തിൽപ്പരം കുടുംബങ്ങളുടെ ഏക ആശ്രയമാണ് ഈ റോഡ്. ഏതാണ്ട് പൂർണമായും വനമേഖലയിലൂടെ കടന്നുപോകുന്ന റോഡ് കുട്ടമ്പുഴ ഗ്രാമപഞ്ചായത്തിന്റെ ഉടമസ്ഥതയിലാണ്. പാലത്തിന്റെ ഒരുവശത്തെ അപ്രോച്ച് റോഡിൽ വലിയൊരു കുഴി രൂപപ്പെട്ട് ആ ഭാഗം ഇടിഞ്ഞുതാഴ്ന്ന അവസ്ഥയിലാണ്. നാട്ടുകാർ തന്നെ പ്ലാസ്റ്റിക് ചാക്കിൽ മണ്ണുനിറച്ച് താത്കാലികമായി അടച്ച് ചെറിയ വാഹനങ്ങൾക്ക് കഷ്ടിച്ച് കടുന്നുപോകാവുന്ന രീതിയിൽ ആക്കിയിട്ടുണ്ട്. എങ്കിലും അതിലൂടെയുള്ള യാത്ര സാഹസികമാണ്. വലിയ വാഹനങ്ങൾക്ക് കടന്നുപോകാനാവാത്തതുകൊണ്ട് ആകെയുണ്ടായിരുന്ന രണ്ട് ബസ് സർവീസുകളും പൂർണമായി നിർത്തിവച്ചു. ഒരു കെ.എസ്.ആർ.ടി.സിയും സ്വകാര്യബസുമാണ് സർവീസ് നടത്തിയിരുന്നത്. അതോടെ 15 കിലോമീറ്റർ ചുറ്റളവിലുള്ള ഗ്രാമീണരുടെ പൊതുഗതാഗതം താറുമാറായി.

കൊവിഡ് വ്യാപനം രൂക്ഷമായ ആദിവാസിമേഖലകളിൽ വൈദ്യസഹായവും ആഹാരവുമൊക്കെ എത്തിക്കാനുള്ള ഏകവഴിയും ഇതുതന്നെയാണ്. മഴശക്തമായാൽ അപ്രോച്ച് റോഡിന്റെ ബാക്കിഭാഗംകൂടി തകരാൻ ഇടയുണ്ട്. നേരത്തെ തന്നെ ദുർബലാവസ്ഥയിൽ ആയിരുന്ന പാലം പുതുക്കിപ്പണിയാൻ എം.എൽ.എ ഫണ്ടിൽ നിന്ന് 24 ലക്ഷം അനുവദിച്ചുണ്ടെങ്കിലും അതിന്റെ നടപടിക്രമങ്ങൾ പൂർത്തിയായി വരാൻ കാലതാമസമുണ്ടാകുമെന്നാണ് അറിയുന്നത്.

അതുകൊണ്ട് കൊവിഡിന്റെ കൂടി പശ്ചാത്തലത്തിൽ ഗ്രാമപഞ്ചായത്തും ജില്ല ദുരന്തനിരാവരണ അതോറിറ്റിയും ഇടപെട്ട് താൽക്കാലിക സംവിധാനമൊരുക്കണമെന്ന് പ്രദേശവാസികൾ ആവശ്യപ്പെട്ടു.

കോതമംഗലത്തുനിന്ന് അടിമാലിയിലേക്ക് വനമേഖലയിൽ കൂടി കടന്നുപോകുന്ന റൂട്ട് എന്ന നിലയിൽ വിനോദസഞ്ചാരികൾ ഏറെ ഇഷ്ടപ്പെടുന്നൊരു യാത്രാമർഗമാണ് കുട്ടമ്പുഴ- മാമലക്കണ്ടം റോഡ്. കോതമംഗലത്തുനിന്ന് തിരിഞ്ഞ് അടിമാലിക്ക് സമീപം ഇരുമ്പുപാലത്ത് ദേശിയപാതയിലാണ് റോഡ് അവസാനിക്കുന്നത്. കൊവിഡ് മഹാമാരിയുടെ പശ്ചാത്തലത്തിൽ കുട്ടമ്പുഴ ഗ്രാമപഞ്ചായത്ത് അടിയന്തര അറ്റകുറ്റപ്പണി നടത്തി റോഡ് ഗതാഗത യോഗ്യമാക്കണം.

കെ.കെ. ഗോപി, ബ്ലോക്ക് പഞ്ചായത്ത് അംഗം

നിരവധി പേർ പ്രതികളായ റോഡ്

1999 ൽ ഡി.വൈ.എഫ്.ഐ കോതമംഗലം താലൂക്ക് കമ്മിറ്റിയുടെ നേതൃത്വത്തിലാണ് വനമേഖലയിലൂടെ ഈ റോഡ് നിർമിച്ചത്. അതിന്റെ പേരിൽ നിരവധി പ്രവർത്തകർ കേസിൽ പ്രതികളാവുകയും ചെയ്തിരുന്നു. അടുത്തകാലത്താണ് ആ കേസ് അവസാനിച്ചത്. 2003 ലാണ് കൂട്ടികുളം പാലം നിർമിച്ചത്.