കൊച്ചി: മന്ത്രി ഇടപെട്ടതിനെ തുടർന്ന് എല്ലാ വിദ്യാർത്ഥികൾക്കും ഓൺലൈൻ ക്ലാസ് ലിങ്ക് നൽകി തൃക്കാക്കര മേരി മാതാ സി.ബി .എസ്. ഇ പബ്ലിക് സ്കൂൾ.ഫീസ് അടക്കാത്ത വിദ്യാർത്ഥികൾക്ക് ഓൺലൈൻ ക്ലാസിൽ പ്രവേശനം നിഷേധിച്ച സ്കൂളിന്റെ നടപടി വിവാദമായിരുന്നു. രക്ഷിതാക്കളുടെ പരാതി ശ്രദ്ധയിൽപ്പെട്ട മന്ത്രി വി .ശിവൻകുട്ടി വിഷയത്തിൽ നേരിട്ട് ഇടപെട്ടു. പ്രശ്നം പരിഹരിക്കുന്നതിന് പൊതുവിദ്യാഭ്യാസ ഡയറക്ടർ കെ ജീവൻ ബാബുവിനെ ചുമതലപ്പെടുത്തി. ഫീസ് അടയ്ക്കുന്നതിൽ വീഴ്ച വരുത്തി എന്നതിന്റെ പേരിൽ ആർക്കും പഠനം നിഷേധിക്കരുതെന്ന് ഡയറക്ടർ സ്‌കൂൾ പ്രിൻസിപ്പലിന് കർശന നിർദ്ദേശം നൽകി. ഇതോടെ എല്ലാ വിദ്യാർത്ഥികൾക്കും ഓൺലൈൻ ക്ലാസ് ലിങ്ക് നൽകാൻ സ്‌കൂൾ അധികൃതർ തയ്യാറാകുകയായിരുന്നു