കളമശേരി: ഏലൂർ, കളമശേരി നഗരസഭകളെ തമ്മിൽ ബന്ധിപ്പിക്കുന്ന പുത്തലത്ത് കടവ് പാലത്തിന്റെ ഇരുവശത്തും സ്ഥാപിച്ചിരുന്ന ഉരുക്കിന്റെ ക്രോസ് ബാർ നശിപ്പിച്ചു. ഒരു ഭാഗത്തെ ക്രോസ് ബാർ കാണാനില്ല. മറുവശത്തേത് വളച്ചുവച്ചിരിക്കുകയാണ്. വലിയ വാഹനങ്ങൾ പോകാതിരിക്കാനാണ് നഗരസഭ ഇവിടെ ക്രോസ് ബാർ പിടിപ്പിച്ചത്. വലിയ വാഹനങ്ങളെയും അമിതഭാരവും താങ്ങാനുള്ള ശേഷി പാലത്തിനില്ല ട്രിപ്പിൾ ലോക് ഡൗൺ സമയത്താണ് ക്രോസ്ബാർ നശിപ്പിക്കപ്പെട്ടതെന്ന് പ്രദേശവാസികൾ പറയുന്നു.

കളമശേരി ഭാഗത്തേക്കുള്ള പാലത്തിന്റെ അപ്രോച്ച് റോഡ് കൈയേറാനുള്ള ശ്രമമുണ്ടായപ്പോൾ മുൻ കൗൺസിലർ സാദിക്കിന്റെ നേതൃത്വത്തിൽ നാട്ടുകാർ എതിർത്തതിനെത്തുടർന്ന് പിന്തിരിഞ്ഞു. കണ്ടെയ്നർ റോഡ് സിഗ്നൽ ഭാഗത്ത് നിന്ന് കണ്ടെയ്നർ ലോറികൾ വഴി തെറ്റി പുത്തലം റോഡിലൂടെ വരുന്നതും ഇലക്ട്രിക് ലൈനുകളും കേബിൾ ടിവി ലൈനുകളും താറുമാറാക്കുന്നതും നിത്യസംഭവമായതിനാൽ അതിനും പരിഹാരം കാണണമെന്നാണ് പ്രദേശവാസികളുടെ ആവശ്യം.