കളമശേരി: അപ്പോളോ ടയേഴ്സിനും കളമശേരി ശ്മശാനത്തിനും ഇടയ്ക്ക് ദേശീയ പാതയ്ക്കരികിൽ കക്കൂസ് മാലിന്യം തള്ളുകയായിരുന്ന ടാങ്കർ ലോറി ആളുകളുടെ ശ്രദ്ധയിൽപ്പെട്ടപ്പോൾ വഴി നീളെ കക്കൂസ് മാലിന്യമൊഴുക്കിക്കൊണ്ട് ഓടിച്ചുപോയി. പള്ളുരുത്തി പിച്ച നാട്ടുപറമ്പ് ചെമ്പുക്കണ്ടം ലെയ്നിൽ സജീബിന്റെ ഉടമസ്ഥതയിലുള്ള KL - 58 - E-4255 നമ്പറിലുള്ള ടാങ്കർ ലോറിയാണെന്നാണ് പൊലീസിൽ നിന്നു കിട്ടിയ വിവരം.

സി.പി.ഐ. ലോക്കൽ കമ്മിറ്റി അംഗവും പാർട്ടി പത്രത്തിന്റെ ലേഖകനുമായ ഇസ്മയിൽ ഇന്നലെ വൈകിട്ട് അഞ്ചു മണിയോടെ കാറിൽ വരുമ്പോഴാണ് മാലിന്യം തള്ളുന്നത് കണ്ടതും തടയാൻ ശ്രമിച്ചതും. തുടർന്ന് , മാലിന്യക്കുഴൽ അടയ്ക്കാൻ പോലും നിൽക്കാതെ വണ്ടി വേഗത്തിൽ ഓടിച്ചുപോയി. ജംഗ്ഷനിൽ പൊലീസിനെ കണ്ടപ്പോൾ യു ടേൺ എടുത്ത് കണ്ടെയ്നർ റോഡ് വഴി കടന്നു കളഞ്ഞു. ഈ സമയമത്രയും കക്കൂസ് മാലിന്യം ലോറിയിൽ നിന്ന് ഒഴുകിക്കൊണ്ടിരിക്കുകയായിരുന്നു. കളമശേരി പൊലീസ് അന്വേഷണം ആരംഭിച്ചു.