കൊച്ചി: എറണാകുളം- അങ്കമാലി അതിരൂപത സഹൃദയയും കാരിത്താസ് ഇന്ത്യയും സംയുക്തമായി നടത്തുന്ന സുധാർ പ്രോജക്ടിന്റെ ഭാഗമായി വാഴക്കുളം പഞ്ചായത്തിൽ അന്യസംസ്ഥാന തൊഴിലാളികൾക്കായി മെഡിക്കൽ ക്യാമ്പ് സംഘടിപ്പിച്ചു. സഹൃദയ ഡയറക്ടർ ഫാ. ജോസ് കൊളുത്തുവെള്ളിൽ അദ്ധ്യക്ഷത വഹിച്ചു. ചടങ്ങിൽ മെഡിക്കൽ ക്യാമ്പിനോടൊപ്പം എല്ലാവർക്കും മാസ്‌ക്, സാനിറ്റൈസർ എന്നിവ അടങ്ങിയ ഹൈജീൻ കിറ്റുകളുടെ വിതരണവും നടത്തി.വാഴക്കുളം പഞ്ചായത്ത് പ്രസിഡന്റ് ഗോപാലകൃഷ്ണൻ ഹൈജീൻ കിറ്റുകളുടെ വിതരണോദ്ഘാടനം നടത്തി. സഹൃദയയുടെ നേതൃത്വത്തിൽ സെന്റർ ഫോർ മൈഗ്രേഷൻ ആൻഡ് ഇൻക്ലൂസീവ് ഡെവലപ്പ്‌മെന്റിന്റെ സഹകരണത്തോടെയാണ് അന്യസംസ്ഥാനത്തൊഴിലാളികൾക്കായി മെഡിക്കൽ ക്യാമ്പ് നടത്തിയത്. ഡയറക്ടർ ബിനോയ് പീറ്റർ, സുധാർ കോർഡിനേറ്റർ അനന്തു ഷാജി, പ്രോഗ്രാം ഓഫിസർ അയാസ് അൻവർ, റെജി കോശി ഡാനിയേൽ എന്നിവർ പങ്കെടുത്തു.